Այսօր «Պոստ Սկրիպտում» ակումբում հոգեբան Կարինե Նալչաջյանը խոսեց բանակում հոգեբանների ինստիտուտի ներդրման, կատարելագործման մասին: Հոգեբանի ձեւակերպմամբ` հոգեբանական խնդիրներ են ունենում ոչ միայն զինվորները այլեւ սպաները. «Նրանց աշխատանքը շատ դժվար է, նրանք գիշեր ցերեկ անձրեւի ձյան տակ են, նրանք անձնական կյանք չունեն, նրանց աշխատանքը հարկավոր է գնահատել ու քննադատելուց առաջ հասկանալ, որ այդ սպաներն իրենց կյանքն անցկացնում են զորքերում: Հոգեբանի մուտքը զորքեր շատ անհրաժեշտ է, եւ լավ է, որ այս ինստիտուտը կա, բայց այն պետք է կատարելագործել»,-համոզված է Նալչաջյանը:
Նալչաջյանի խոսքով` այսօր բուհերում հոգեբանության բաժինները ծաղկում են. «Հատկապես մանկավարժական համալսարանը պատրաստում է ռազմական հոգեբանների, եւ այդ ուսանողների մոտ, որոնք հիմնականում աղջիկներ են, զորամասում աշխատելու ցանկությունն ու մղումը կա, շատ մեծ է, բայց նրանց այդ ցանկությունը ռոմանտիկ է եւ կարող է կոտրվել, երբ նրանք մտնեն զորամաս աշխատելու, հաշվի առնելով մեր ազգային առանձնահատկությունները: Շատ լավ կլինի, որ զորամասերում աշխատեն հատկապես տղամարդ հոգեբանները»:
Եվա ՀԱԿՈԲՅԱՆ
