Մարզի համայնքների աղտոտվածությունն ու ոչ մաքուր լինելը բոլորովին չեն խթանում ճյուղի զարգացմանը:
Լոռու մարզում ներքին տուրիզմ զարգացնելու նպատակով արդեն հինգ ամիս է իր գործունեությունն է ծավալում ANG lori travel տուրիստական գործակալությունը:
Գործակալությունը միակն է մարզի տուրիստական գործակալություններից, որ իր առջեւ խնդիր է դրել արշավների կազմակերպման ու անցկացման ծրագրերով` գյուղական համայնքներում առկա եկեղեցիներ, մարզի տարածքում գտնվող հուշարձաններ այցեր կատարելով, խթանել մարզի պատմամշակութային ժառանգության ճանաչմանն ու այդկերպ ապահովել տուրիստների հոսք մարզի տարածք:
«Մեր նպատակը մարզում ներքին տուրիզմ զարգացնելն է, եւ հիմնական նպատակը երիտասարդներին ակտիվացնելն է, երիտասարդության մեջ սեր մտցնելն է հայրենիքի հանդեպ, որովհետեւ ամեն արշավից, ամեն հանդիպումից հետո նրանց մոտ շատ բան է փոխվում: Ոգեւորվում են, այլ աչքով են նայում մեր հայրենիքին»,-Aravot.am-ի հետ հարցազրույցում նշում է ANG lori travel տուրիստական գործակալության գործադիր տնօրեն Գեւորգ Վարդանյանը:
Կարդացեք նաև
Նա, սակայն, նշում է, որ Լոռու մարզը, այնուամենայնիվ, տուրիզմի զարգացման առումով դեռ քնած է:
Նա բացատրում է, որ տուրիզմի զարգացման համար մեկ թշնամին` համայնքների աղտոտվածությունն ու ոչ մաքուր լինելը խոչընդոտում են այս ճյուղի զարգացմանը մարզում:
«Հաճախորդների պակասից զատ առկա են նաեւ այլ խնդիրներ: Մարզում շատ խնդիրներ ունենք`գյուղական համայնքներում ճանապարհների անմխիթար լինելը, աղտոտվածությունը: Այսօր մեր գյուղական համայնքների համայնքապետերը չեն զբաղվում իրենց գյուղում գտնվող հուշարձանների տարածքի մաքրման աշխատանքներով: Սա մեզ համար շատ մեծ խնդիր է: Եթե ուզում ենք զարգացման առումով ինչ-որ քայլ անել, ապա մարզպետարանն էլ դրանով պիտի շատ լուրջ զբաղվի, որովհետեւ կարեւոր է մեր մարզի համար»,-ասում է նա` նկատելով, որ եթե դրսից տուրիստներ բերելու լինեն Լոռի, ստիպված են լինելու նախօրոք սեփական ուժերով մաքրել այս կամ այն հուշարձանի տարածքը:
Գյուղական համայնքներից զատ, ըստ Գեւորգ Վարդանյանի, Վանաձորն էլ չի փայլում տուրիստների աչքը շոյելու հատկությամբ:
«Հիմա Վանաձոում մի խնդիր կա. մեր քաղաքին չեն հետեւում, մեր քաղաքի պատերի հայտարարությունները քաղաքի տեսքը գցում են, մեր այգիներն այսօր այն տեսքին չեն, աղբ է, տուրիստին ինչ ցույց տանք: Այդ ամենը տուրիզմի զարգացման համար մեծ մինուսներ են, չենք կարող բերել, որ տեսնեն` քաղաքը կեղտոտ է»,-ասում է ANG lori travel տուրիստական գործակալության գործադիր տնօրեն Գեւորգ Վարդանյանը` տեղեկացնելով, որ չնայած խնդիրներին, ձեռքները ծալած չեն նստում:
Անուշ ԲՈՒԼՂԱԴԱՐՅԱՆ
