Նա հույս հայտնեց, որ ոստիկանները չեն փակի ճանապարհները
Ապրիլի 4-ին Նոյեմբերյան քաղաքում կայացած հանդիպման ժամանակ Րաֆֆի Հովհաննիսյանը հայտարարեց. « Հիմա Դուք լավ գիտեք, որ ապրիլի 9-ին, ժամը 11-ին Հայաստանի ողջ ժողովուրդը, հայերը, ազգային փոքրամասնությունները, սփյուռքը, Արցախը եւ Հայաստանի Հանրապետությունը ի մի է գալիս, հանրագումարում Ազատության հրապարակով՝ ձեր եւ մեր կրած հաղթանակը ի կատար ածելու համար: Այս անգամ, հարգանք բոլոր նախորդներին, հաղթած նախորդ նախագահներին, մենք տանելու ենք մեր պայքարը մինչեւ ձեր պատգամի իրականացում եւ դրանում ոչ մի կասկած թող չլինի որեւէ մեկի մոտ»: Նա հավելեց. «Ապրիլը, որ եղել է մեզ համար եղեռն եւ մահ, եւ հայրենիքի կորուստ, ապրիլը դառնալու է ձեր քվեով նաեւ հարություն եւ ապագա: Եվ ապագան բերում ենք նաեւ Նոյեմբերյան, որովհետեւ դուք հավատալով ձեզ եւ ինձ, ես էլ՝ ձեզ, կազմում ենք այդ հզոր, խաղաղ, իրավական հավաքագրված համազգային բանակը, որ ապրիլի 9-ին հավաքվելու է եւ ասելու է, որ սա մեր հայրենիքն է եւ մեր ապագան»: Րաֆֆի Հովհաննիսյանը հույս հայտնեց, որ ապրիլի 9-ին ոստիկանությունը չի փակի ավտոճանապարհները:
Ոսկան ՍԱՐԳՍՅԱՆ
