Ապրիլի 20-ին տեղի կունենա «Երեւանը` գրքի համաշխարհային մայրաքաղաքի» հռչակման ամփոփիչ հանդիսավոր արարողությունը:
«Քաղաքը կրում էր այդ տիտղոսը, իսկ քաղաքացին հանդիսանում էր գրքի քարոզիչը: Երիտասարդներն ու ալեհերներն ակտիվ կերպով մասնակցում էին կազմակերպած յուրաքանչյուր միջոցառմանը»,-այսօր լրագրողների հետ հանդիպման ժամանակ նշեց քաղաքապետի խորհրդական Արամ Սուքիասյանը:
Նրա պնդմամբ, բարձր կարելի է գնահատել միջոցառումների ցանկը, հատկապես բացման արարողությունից հետո.
«Երեւանն ակտիվացավ, ընթերցասերը շատացավ, գրադարանների այցելուները աճել են 7 տոկոսով, տպագրվել են հարյուրավոր հեղինակների գրքեր: Հայ ընթերցողը ունեցավ իր անձնական գրադարանը, բազմաթիվ հյուրեր այցելեցին Երեւան, իսկ հայ հանրույթը ներկայանալի եղավ»:
Կարդացեք նաև
Պրն. Սուքիասյանի խոսքով՝ մինչ լուսաբաց քաղաքացին ականատես ու մասնակից կլինի նոր հրատարակված գրքերի շնորհանդեսների, «Գրքի ճանապարհ» ֆիլմի պրեմիերային, սիմֆոնիկ ու հոգեւոր երաժշտության համերգներին, ջազային ու թատերականացված ծրագրերին, կամերային ու երգչախմբային կատարումներին, հեղինակային երգի ու ասմունքի ծրագրերին, հեղինակավոր գրողների սեմինար-քննարկումներին, գրքի ցուցահանդես-վաճառքին եւ այլն:
Բոհեմական մշակութային գիշեր կլինի Երեւանի քաղաքապետարանում: Յուրաքանչյուր քաղաքացի հնարավորություն կունենա մասնակիցը լինել այդ ամենի:
Անժելա ՇԱՀՈՒՄՅԱՆ
