«Բյուրոկրատ» գրախանութում այսօր տեղի ունեցավ Բրիտանական ֆիլմերի 11-րդ փառատոնի շրջանակում կազմակերպված ֆիլմերի լավագույն գրախոսականի մրցույթի մրցանակաբաշխության արարողությունը:
Բրիտանական խորհրդի, Երևանում Բրիտանական դեսպանատան, փառատոնի գլխավոր հովանավոր «ԱրմենՏել» ընկերության եւ Կինոքննադատների և կինոլրագրողների հայկական ասոցիացիայի հետ համատեղ հայտարարված գրախոսականի մրցույթի մասնակիցները պետք է գրեին փառատոնում ընդգկված ֆիլմերին նվիրված գրախոսություն:
«Մրցույթի նպատակն է` խրախուսել եւ աջակցել քննադատ-արվեստագետի մտածողության զարգացմանը: Ոլորտը կարիք ունի զարգացման: Ոգեշնչող է, որ մենք ունենք այնպիսի կադրեր, որոնց հետ արժե աշխատել եւ որոնց զարգացման համար ներդրում կատարելն օգտակար է հասարակությանը»,-լրագրողների հետ զրույցում ասաց Բրիտանական խորհրդի արվեստի ծրագրերի ղեկավար Նարեկ Թովմասյանը: Նա հայտնեց, որ այս տարի մրցույթին ներկայացվել էր 25 գրախոսական, ինչը Հայաստանի նման փոքր երկրի պարագայում մեծ թիվ է:
Մրցույթի հատուկ մրցանակակիրներն են Արփի Ոսկանյանը եւ Արթուր Վարդիկյանը, իսկ առաջին մրցանակակիրն է «Առավոտ» օրաթերթի լրագրող Գոհար Հակոբյանը, ով պարգեւատրվեց Apple iPad 4-ով: Գոհար Հակոբյանը ներկայացրել էր Անդրեա Արնոլդի «Ակվարիում» ֆիլմի գրախոսականը: «Ֆիլմը չհասկացված դեռահասի մասին է: Կուզենամ, որ աշխարհում ոչ մի երեխա չհասկացված չլինի»,-ասաց Գոհար Հակոբյանը, ապա հավելեց, որ բրիտանական մշակույթն իր «թուլությունն» է, լինի ֆիլմ, թատրոն, թե գրականություն. «Ֆիլմը ոչ միայն արվեստի տեսակ է, այլեւ մեր կյանքի յուրատեսակ արտացոլումը»:
Կարդացեք նաև
Մրցանակները շնորհեց Միացյալ Թագավորության Արտաքին գործերի նախարարության Արևելյան Եվրոպայի և Կենտրոնական Ասիայի տարածաշրջանի ղեկավար Քոլին Ռոբերտսը: «Սովորաբար, ֆիլմերին որպես արվեստի գործ նայելու մտայնություն կա: Իհարկե, արվեստն ինքնին կարեւոր է, բայց իրականում ֆիլմարտադրությունը եւ, առհասարակ, ստեղծագործական արվեստը տնտեսության կարեւոր մասն են կազմում: Դա լուրջ բիզնես է, որը կարող է երկրի տնտեսությանը մեծ օգուտ բերել,-ասաց նա, ապա հավելեց,-Մեծ Բրիտանիայի կառավարությունը ջանքեր է գործադրում աջակցել կրեատիվ ինդուստրային: Կրեատիվ արդյունաբերությունը ոչ միայն դժվար, այլեւ հաճելի աշխատանք է: Եթե բրիտանացիները եւ հայերը դա կարողանան համատեղ իրականացնել, հոյակապ կլինի»:
Լուիզա ՍՈՒՔԻԱՍՅԱՆ
