Ազգային ժողովի Էթիկայի հանձնաժողովն այսօրվա նիստում վարույթ է ընդունել «Մոսկվայի տան» տնօրեն Արմինե Թյությունջյանի դիմումը:
Հիշեցնենք, որ «Մոսկվայի տան» տնօրեն Արմինե Թյութունջյանը վիրավորվել էր ԱԺ Հանրապետական պատգամավոր Նաիրա Կարապետյանի խոսքերից եւ դիմել էր ԱԺ Էթիկայի հանձնաժողով:
ՀԱԿ խմբակցության պառգամավոր Լյուդմիլա Սարգսյանը նիստին չի մասնակցել, քանի որ ավելի վաղ ՀԱԿ-ը հայտարարել էր, որ դեռ պետք է որոշում կայացնի` այդ հանձնաժողովում իր մասնակցության վերաբերյալ:
Սակայն, Aravot.am-ի հետ զրույցում տիկին Սարգսյանն ասաց, որ ինքը դեմ է Նաիրա Կարապետյանի նկատմամբ հարցի քննությանը. «Անկախ նրանից, թե Նաիրա Կարապետյանը որ խմբակցության անդամ է, նա կին պատգամավոր է, ում վարքագծում առ այսօր ես ոչ մի բասացական բան չեմ տեսել: Մանավանդ, որ նրա դեմ բողոքում բերված փաստերը հրապարակային չեն եղել եւ ես վստահ չեմ, որ նման բան տեղի է ունեցել: Խորհրդարանի կին պատգամավորներն ինչ-որ առումով նաեւ հայ կնոջ հավաքական կերպար են ներկայացնում, չի կարելի այդ կերպարը խեղաթյուրել: Եթե Նաիրա Կարապետյանն իսկապես սխալ բան արել է, ապա, կարծում եմ, բոլոր այն խոսակցությունները եւ մամուլի հրապարակումները, որ եղան մինչ հարցն էթիկայի հանձնաժողով ընդունելը, նրա համար բավարար էին»:
Կարդացեք նաև
Տիկին Սարգսյանն այն կարծիքին է, որ խորհրդարանում կան մարդիկ, ովքեր արժանի են Էթիկայի հանձնաժողովի «դատին» արժանանալու, մինչդեռ, չգիտես ինչու, նման մարդկանց նկատմամբ հանձնաժողովը բավականին բարեհաճ է:
Նելլի ԳՐԻԳՈՐՅԱՆ
