Ելենա Ֆետիսովայի «Փարաջանով» ֆիլմը Օդեսայի կինոփառատոնում արժանացել է «Բրոնզե» մրցանակին: Հայտնում է «Նովիյե իզվեստիա» լրատվականը:
Փառատոնի գլխավոր եւ հանդիսատեսի համակրանք մրցանակներին է արժանացել Ալեքսանդր Վելեդինսկու «Աշխարհագրագետը խմելու է տվել գլոբուսը» ֆիլմը, որը նաեւ «Կինոավատար» փառատոնի հաղթողն էր:
Համեմատելով այս երկու ֆիլմերը՝ լրատվականը գրում է, որ նվազ կատարյալ է «Փարաջանով»-ը, բայց ավելի նշանակալի: Փարաջանովի դերը խաղացել է ֆրանսահայ ռեժիսոր Սերժ Ավետիքյանը, ով անձամբ էր ծանոթ արվեստագետի հետ եւ հիշում էր նրա ժեստերն ու դեմքի արտահայտությունները:
Լրատվականը գրում է, որ ֆիլմը սովետական երեք հանճարեղ ռեժիսորներից երկրորդի ողբերգական կյանքի մասին է (առաջինը՝ Սերգեյ Էզեյնշտեյն, երրորդը՝ Անդրեյ Տարկովսկի), որը միասեռականության մեղադրանքով ազատազրկման էր դատապարտվել ու որին օգնելու համար միջամտել էին համաշխարհային ճանաչում ունեցող ռեժիսորները՝ Ֆրանսուա Տրյուֆոն, Ժան-Լյուք Գոդարը, Ֆեդերիկո Ֆելինին, Լուկինո Վիսկոնտին, Ռոբերտո Ռոսելինին, ինչպես նաեւ կոմունիստ գրող Լուիս Արագոնը, որն այդ հարցով դիմել էր անմիջապես Բրեժնեւին:
Կարդացեք նաև
Ֆիլմի ցուցադրությունից մի քանի օր առաջ Օդեսայի գրականության թանգարանում բացվել էր Փարաջանովի ցուցահանդեսը, որը, ինչպես գրում է լրատվականը, հաստատեց, որ Փարաջանովը ոչ միայն ֆիլմերում է տեսային հանճար, այլ նաեւ կոնցեպտուալ արվեստում:
Պատրաստեց Հովհաննես ԻՇԽԱՆՅԱՆԸ
