Այսօր «Հայազն» կուսակցության անդամները քաղաքապետարանի մոտից երթով եկան տրանսպորտի նախարարության մոտ: Ակտիվիստների խոսքերով՝ իշխանության ներկայացուցիչները փորձում են ուղեվարձի թանկացման ամբողջ պատասխանատվությունը դնել միայն քաղաքապետարանի վրա. «Տրանսպորտի նախարարության կամ կառավարության պատասխանատվությունը ոչ մի գրամով պակաս չէ: Վստահ ենք, որ նման որոշումներ, որոնք կարող էին սոցիալական հուզումներ առաջացնել Հայաստանում, ոչ մի քաղաքապետ, ոչ մի Տարոն Մարգարյան ռիսկ չէր անի որոշել առանց նախագահի համաձայնության եւ միգուցե նաեւ՝ հանձնարարության»:
«Հայազնի» անդամները հիշեցնում էին, որ Գագիկ Բեգլարյանն էլ է քաղաքապետ եղել եւ նրա ժամանակ տրանսպորտի վիճակն ավելի լավ չէր. «Մենք դարձյալ երթեւեկում էինք կռացած վիճակում՝ լցված մեքենաներով, սպասարկման մեջ քաղաքավարության բացարձակ բացակայության պայմաններում: Գծատերերը դարձյալ իրենց գերշահույթները ստանում էին: Այն, որ այս որոշումը ինքը չի կայացրել, այլ Տարոն Մարգարյանն է կայացրել՝ դա դեռ ոչ մի բան չի փոխում: Հայաստանում քաղաքային տրանսպորտը տնտեսության մի մասն է եւ այն չի կարող լինել մասնավոր անձանց ձեռքերում: Հայաստանում քաղաքային տրանսպորտը պետք է լինի համայնքային սեփականություն, եւ դա պետք է լինի պետական որոշումը: Չենք հավատում, որ այս իշխանությունն ընդհանրապես ի վիճակի է որեւէ օգտակար բան որոշել»:
Կարդացեք նաև
Ակտիվիստները նախարարության առջեւ բղավում էին՝ «Ամո՛թ»:
Հռիփսիմե ՋԵԲԵՋՅԱՆ
