Այսօր Սյունիքի մարզի Մեղրի քաղաքում տեղի ունեցավ սոցիալ-տնտեսական իրավունքների պաշտպանության ընդունարանի բացման արարողությունը:
Ծրագրի ղեկավար Աննի Հայրապետյանի խոսքով՝ նորաբաց ընդունարանը Մեղրու տարածաշրջանի համայնքներին եւ բնակիչներին կտրամադրի մասնագիտացված, սոցիալ-տնտեսական իրավունքներին վերաբերվող հատուկ փորձագիտական աջակցություն: Մեղրու փոխքաղաքապետ Վանիկ Սարգսյանը կարեւորեց այն հանգամանքը, որ ընդունարանը գործելու է Հայաստանի հեռավոր հարավային տարածաշրջանում, առավելեւս, երբ տարածաշրջանում մինչ այժմ նման գործառույթներ իրականացնող կառույց չի գործել Մեղրիում:
«Մենք, տեղական ինքնակառավարման մարմինների ներկայացուցիչներս, առավել կարևորում ենք բնակչության իրավունքների պաշտպանությունը և նման ծրագրերի արդյունավետ իրականացումը, ինչի շնորհիվ մեր հասարակությունը և համայնքները իրենց կզգան ավելի պաշտպանված», – նշեց փոխքաղաքապետը :
Ընդունարանի բացման արարողությանը ներկա էր նաև Մեղրու տարածաշրջանի Ագարակի քաղաքապետ Մխիթար Զաքարյանը, ով խոստացավ արդյունավետ համագործակցել և աջակցել բնակչության սոցիալ-տնտեսական իրավունքների պաշտպանության հարցերում:
Կարդացեք նաև
Բացման արարողությանը ներկա էին նաեւ տեղական պետական եւ հասարակական մի շարք կառույցների ներկայացուցիչներ:
Ընդունարանը գործելու է Եվրոպական միության կողմից ֆինանսավորվող «Իմացիր քո իրավունքները» ծրագրի շրջանակներում, իսկ աշխատանքներն իրականացվել են «Սյունիքի երիտասարդական կենտրոն» հասարակական կազմակերպության կողմից:
Մերի ՍՈՂՈՄՈՆՅԱՆ
