Այսօր կեսօրին Ոստիկանության Կենտրոնի բաժանմունք տարված Armenia Today կայքի վերլուծաբան Արգիշտի Կիվիրյանին քիչ առաջ ազատ են արձակել:
Նա Aravot.am-ին պատմեց, որ իրեն այնտեղ բռնի ուժով պահել են ավելի քան երեք ժամ` առանց բացատրության, թե ինչու են տարել: Ա. Կիվիրյանը մինչեւ վերջ հրաժարվել է ստորագրել որեւէ փաստաթղթի տակ. «Որովհետեւ բոլոր գործողությունները եղել են ապօրինի: Ես երեք ժամ 20 րոպե ապօրինաբար զրկված եմ եղել ազատությունից: Մի քանի անգամ ասացին կարող ես գնալ, բայց երբ ուզում էի դուրս գալ, չէին թողնում, հետո հասկացան` չափը շատ են անցնում, ինձ բաց թողեցին»:
Ա. Կիվիրյանը դիմելու է դատաբժշկի. «Այսօր գնացի այնտեղª շատ հերթ էր , ստիպված վաղն էլ կգնամ: Իսկ ապօրինություններ կատարած ոստիկաններին պատասխանատվության ենթարկելու եւ իմ իրավունքների վերականգնման հարցով կզբաղվի իմ փաստաբանը»:
Արփինե ՍԻՄՈՆՅԱՆ
