Առաջիկայում Վանաձորն ու հարակից համայնքները կոշտ կենցաղային թափոնների համակողմանի կառավարման համակարգ կունենան:
Գերմանական զարգացման բանկի կողմից ֆինանսավորվող դրամաշնորհային ծրագիրը նպատակ ունի զարգացնելու Վանաձորի եւ շրջակա համայնքների կոշտ կենցաղային թափոնների համակողմանի կառավարման համակարգը:
Բացի այդ` մտադրություն կա Հայաստանում ստեղծելու ռեգիոնալ աղբահանության համակարգ:
«Այսօր մենք լավ, թե վատ, ունենք աղբահանություն, ամեն համայնք ինքն իր համար ինչ-որ կերպ կազմակերպում է այդ հարցը: Ոչ մեկիս համար գաղտնիք չէ, որ հանրությանը այդ որակի աղբահանությունը չի բավարարում: Հաշվարկները ցույց են տվել, որ մենք պիտի ունենանք ռեգիոնալ աղբահանություն»,-այսօր Վանաձորի քաղաքապետարանում ՀՀ կառավարության և Ասիական զարգացման բանկի համագործակցությամբ և վերջինիս ֆինանսական աջակցությամբ Հայաստանում իրականացվող կոշտ կենցաղային թափոնների կառավարման բարելավման դրամաշնորհային ծրագրի խորհրդատվական ծառայությունների տեխնիկական առաջադրանքի շրջանակներում կազմակերպված միջանկյալ հաշվետվության ժամանակ ասաց ՀՀ տարածքային կառավարման փոխնախարար Վաչե Տերտերյանը:
Կարդացեք նաև
Ծրագրի արդյունքում ստեղծվելու են հինգ ռեգիոնալ աղբավայրեր, նաեւ Երեւանը, Վանաձորը համակարգի կենտրոնն է դառնալու:
Անդրադառնալով սակագների հնարավոր փոփոխությանը` փոխնախարարը նշեց, որ այնուամենայնիվ, փոփոխություններ սպասվում են:
«Սակագների առումով ակնհայտ է, որ փոփոխություններ են նախատեսվում, սակայն, սակագինը կորոշվի այլ քննարկումների ժամանակ: Հիմա մեր խնդիրը մեկն է` ճիշտ հաշվարկել, թե ինչ կարժենա ստանդարտներին համապատասխան լավ ծառայությունը: Եթե մենք կարողանում ենք 5 աղբավայրով այս խնդիրը լուծել, դա լավ ցուցանիշ է, որովհետեւ մեր փոքր երկրի համար հինգ աղբավայրը քիչ չէ»,-նշեց Վաչե Տերտերյանը:
Նախնական հաշվակներով` նոր որակի աղբահանության համար քաղաքացիները հնարավոր է վճարեն ամսական 345 դրամ այժմյան 250-ի փոխարեն:
«Եթե ժողովուրդը տեսնի, որ կատարված աշխատանքները բարձր մակարդակի են, արդեն կասի, որ փոփոխությունը արդարացված է»,-իր խոսքում նշեց Վանաձորի քաղաքապետ Սամվել Դարբինյանը:
Անուշ ԲՈՒԼՂԱԴԱՐՅԱՆ
