Երեկ «Մոսկվա» կինոթատրոնում կայացավ ճանաչված կինոռեժիսորներ, «Այսօր պլյուս» անկախ ֆիլմարտադրության հիմնադիրներ Նարինե Մկրտչյանի եւ Արսեն Ազատյանի «Ապակե կախազարդ» նոր գեղարվեստական ֆիլմի պրեմիերան: Նկարը երիտասարդ զույգի դրամատիկ սիրո պատմություն է, պարզ մարդկային պատմություն, որը որքան հայկական է, այնքան էլ համամարդկային է: Այն մարդու ազնվության, խղճի, նվիրվածության ու անձնազոհության մասին է, եւ ամենակարեւորը՝ միմյանց խնայելու: Մի բան, որ վերջին շրջանում բացակայում է գրականության մեջ, կինոյում եւ կյանքում:
ֆիլմը բացի գեղարվեստական, ռեժիսորական եւ այլ արժեքներից, կարեւոր մի արժանիք էլ ուներ, այն մի տեսակ «կիրթ» ֆիլմ էր եւ ասելիքով, եւ նրանով, որ չկար ոչ մի վուլգար բան ու հերոսները խոսում էին գեղեցիկ հայերենով: «Ապակե կախազարդի» ուղերձներից մեկն էլ հետեւյալն էր՝ պետք է կարողանաս մարդկանց նվիրել ինչ-որ բան՝ փոքրիկ հուշանվեր, բարություն, սեր, նվիրվածություն, հոգատարություն, ի վերջո նաեւ անձդ: Միայն այդ դեպքում քեզ կհիշեն: Բոլորիս կյանքը մի դիպվածով կարող է այնպես փոխվել, որ մտքներիս ծայրով անցկացրած էլ չկանք:
Ֆիլմի գլխավոր դերերը հրաշալի մարմնավորել են երիտասարդ դերասաններ Նարեկ Ներսիսյանն ու Մագդալենա Մնացականյանը։ Նարինե Մկրտչյանն ասաց, որ երիտասարդ դերասանների աշխատանքը հավասարազոր էր հերոսության: Ֆիլմում նկարահանվել են նաեւ Կարեն Ջանիբեկյանը, Սամսոն Ստեփանյանը, Նարինե Գրիգորյանը, Վահագն Սիմոնյանը եւ ուրիշներ:
Նարինե Մկրտչյանն ու Արսեն Ազատյանը ֆիլմի ցուցադրումից առաջ բեմ հրավիրեցին ստեղծագործական կազմին ու բոլորից հատիկ առ հատիկ շնորհակալություն հայտնեցին, չմոռացան նաեւ հովանավորներին:
Կարդացեք նաև
Գոհար ՀԱԿՈԲՅԱՆ
Ֆիլմը դեռ չեմ դիտել, բայց թրեյլերը շատ անիմաստ էր, չի հասկացվում, թե ինչի մասին է ֆիլմը:Տպավորություն է ստեղծվում, որ ֆիլմից պատահականությամբ կտորներ են միացրել ու կազմել թրեյլեր: