Օգոստոսի վերջերին Արագածոտնի մարզի Ոսկեվազ, Օշական համայնքների մոտ 150 բնակիչներ ջրից թունավորվել էին. առողջապահության նախարարությունն էր տեղեկացրել, որ թունավորման պատճառը խմելու ջուրն է եղել: Ըստ որոշ լրատվամիջոցների, խմելու ջուրը վարակվել էր, քանի որ այդ համայնքում գործող «Հայասի» գործարանը արտադրական թափոնները պարբերաբար լցնում է գետը, որտեղից նաեւ ջրամբար է գնում ջուրը:
Այսօր Aravot.am-ը «Հենարան» ակումբում «Հայջրմուղկոյուղի» ընկերության ջրի որակի վարչության պետ Մինաս Բերույանից հետաքրքրվեց, արդյոք պարզել են, թե ինչն է եղել թունավորման պատճառը եւ հնարավոր է հենց գործարանի թափոնները խառնված լինեն խմելու ջրին: Պարոն Բերույանի խոսքերով` այդ ամբողջ ժամանակահատվածում ստուգվել է ջրի որակը եւ ոչ մի տեսակի շեղումներ չեն նկատվել: Պարոն Բերույանն ասաց, որ դեռ ուսումնասիրման փուլում է, եւ դեռ հստակ չէ մարդկանց թունավորման պատճառը:
Aravot.am-ի այն հարցին՝ արդյոք մասնագետը բացառում է, որ գործարանի թափոնները կարող են խառնվել խմելու ջրին, «Հայջրմուղկոյուղի» ընկերության ներկայացուցիչն ասաց` «Ոչ, ես չեմ կարող բացառել, մեր ջրագծերը հին են, եւ անցնում են գործարանի տարածքով»:
Մանրամասն` տեսանյութում
Ասուլիսին ներկա էին նաեւ «Երեւան-ջուր» ընկերության ներկայացուցիչները` լաբորատորիայի բաժնի պետ Սոֆիա Ասատրյանը եւ լրատվամիջոցների հետ կապերի պատասխանատու Մուրադ Սարգսյանը, որոնք վստահեցրին, որ իրենց մատակարարած ջուրը համապատասխանում է Հայաստանում գործող չափանիշերին:
Հարցին, թե հնարավոր է գերքլորացված լինի խմելու ջուրը, ընկերության ներկայացուցիչներն ասացին, որ այդ գործընթացը ավտոմատ է կատարվում եւ բացառվում է գերքլորացումը: «Իսկ ընդհանրապես, եթե ջրից քլորի համ եք առնում,- ինչպես ասաց պարոն Մուրադյանը,- պետք է ուրախ լինեք, քանի որ քլորի համ առնելով, վստահ եղեք` ջուրն անվտանգ է: Եթե քլոր չկա, կնշանակի ամոնյակի առկայություն կա»:
Նելլի ԲԱԲԱՅԱՆ
