«Նախախորհրդարան» ազգային քաղաքական նախաձեռնությունը մշակել է «Նոր որակի հայկական պետության ձևավորման և զարգացման ռազմավարական հայեցակարգի նախագիծ»: Այսօր «Ուրբաթ» ակումբում «Նախախորհրդարանի» անդամները տեղեկացրին նախագծի հանրային ներկայացման և քննարկման մեկնարկի մասին:
«Նախախորհրդարանի» համակարգող Գարեգին Զուգասզյանը նշեց, որ ՀՀ-ն ռիսկային որոշումների առաջ է կանգնած լինելու և դրա համար պետք է խնդիր դրվի մտավոր ներուժի համախմբման:
Խոսելով ՀՀ-ում նկատվող անկայունության մթնոլորտի մասին՝ պարոն Չուգասզյանն ասաց. «Երբ համակարգերի միջև անկայունությունն աճում է, մի փոքրիկ թիթեռ անգամ կարող է որոշել ընթացքը: Սակայն միայն կամք ունեցող ուժերը կարող են դա անել: Մեր ներսում՝ որպես պետական կազմավորում, լրջագույն փոփոխություններ պիտի իրականանան: Հիերարխիկ կառուցվածքը ՀՀ-ին զրկում է ճկուն և արագ արձագանքելու հնարավորությունից: Եթե այդ փոփոխությունները չանենք, կարող ենք հայտնվել հետնապահ երկրների շարքում: Այժմ մենք աստիճանաբար կորցնում ենք մեր անկախության էլեմենտները, դրա վառ օրինակն է այն, որ սեպտեմբերի 3-ին նախագահ համարվող անձը առանց համաժողովրդական և որևէ այլ քննարկման հայտարարեց Մաքսային միությանն անդամակցելու որոշման մասին»:
«Նախախորհրդարանի» անդամ, քաղաքագետ Իրինա Ղափլանյանն այս որոշման օրինակով ՀՀ արտաքին քաղաքականությունը որակեց «ռեակտիվ»: Հետո նշեց, որ ՀՀ-ն գտնվում է այնպիսի աշխարհաքաղաքական դիրքում, որ «կամ-կամ»-ի խնդիր չէր կարող առաջանալ:
Կարդացեք նաև
Aravot.am-ը հետաքրքրվեց՝ մի՞թե երկրի ղեկավարությունն այդ ամենը չէր հասկանում, որ նման որոշում կայացվեց: Պարոն Զուգասզյանը պատասխանեց. «Մեր երկրի ղեկավարությունը չի համապատասխանում ժամանակի պահանջներին: Հայ ժողովրդի ներուժը լրիվ թույլ է տալիս, որ մենք նորացնենք մեր ընտրախավը, սակայն ընտրությունից զրկելով հայ ժողովրդին՝ մենք արհեստականորեն նեխում ենք ստեղծում մեր կառավարման համակարգում: Ուստի մեն հաջորդ կառավարման խումբը որակապես ավելի վատն է դառնում, քան նախորդը: Սրա լուծումը օր առաջ այդ պարազիտային խավից ազատագրումն է»:
Լրագրողները հետաքրքրվեցին՝ Ժիրայր Սեֆիլյանի հետապնդումը արդյոք կապ ունի՞ Սամվել Ալեքսանյանի հետ, քանի որ, ինչպես «Նախախորհրդարանի» անդամները նշեցին, Սամվել Ալեքսանյանի թիմից մեկը մոտեցել է Ժիրայր Սեֆիլյանին ու հրավիրել առանձնազրույցի: Պարոն Զուգասզյանը պատասխանեց. «Այս պահին մենք փաստերն ենք արձանագրում, հեռու գնացող եզրակացություններ անել չենք կարող: Հետապնդումները նոր չեն. այս շարժման մասնակիցները բազմիցս ենթարկվել են հետապնդման, դրանով փորձում են սպառնալ ու ահաբեկել: Բայց մենք շարունակում ենք առաջ տանել մեր պայքարը»:
Հարցին՝ արդյոք «Ծածկած շուկայի» խնդիրը պատրա՞ստ են քննարկել սոցիալիստական շարժման ղեկավար Ռոբերտ Ահարոնյանի հետ, ով ակտիվություն է ցուցաբերում շուկայի հարցերում: Պարոն Զուգասզյանը պատասխանեց. «Օլիգարխի ստեղծած գրպանային կուսակցության ղեկավարի հետ պատրաստ չենք որևէ քննարկում վարելու: Մենք պատրաստ ենք քննարկում վարելու միայն պատկան մարմինների հետ»:
Խոսելով փոխզիջումների մասին՝ Գ. Զուգասզյանն ասաց. «Մենք պատրաստ ենք պահել այդ հուշարձանը իր (նկատի ունի Ս. Ալեքսանյանին.-Տ.Հ.) ձեռքերում, եթե նա տիրոջ վարք ցուցաբերի դրա նկատմամբ, եթե վերականգնվի շուկայի ճարտարապետական տեսքը»:
Տաթև ՀԱՐՈՒԹՅՈՒՆՅԱՆ
Այս հանցավոր ռեժիմին կարելի է շատ հանգիստ սրտով փոխարինել, որևէ գաղութի կալանավորների
հետ, առանց երկմտելու և այդ կալանավորներից՝, ,,որոնց նկատմամբ ես առանձնապես համակրանք
չունեմ,, սպսաելի է շատ ավելի մարդկային արարքներ: