Հոկտեմբերի 15-ին Հայաստանի Հանրապետության Վերաքննիչ դատարանում տեղի ունեցավ ազատամարտիկ, պահեստազորի գնդապետ Վոլոդյա Ավետիսյանի դատական գործի քննությունը, որի ընթացքում բողոքարկվում է ազատամարտիկի կալանքի տակ պահելու որոշումը:
Ազատամարտիկի կողմնակիցները որոշմանը սպասում էին դատարանի շրջակայքում: Վոլոդյա Ավետիսյանին սատարելու էր եկել նաև «Հայաստանի նոր քաղաքականի մշակույթ» կուսակցության նախագահ Անի Զաքարյանը: Ազատամարտիկ Կարեն Մելիքբեկյանը հայտարարեց՝ իրենք քաղաքական գործիչների հետ գործ չունեն. «Ով՝ ուզում է, որպես սատարող քաղաքացի գալ կանգնել, թո՛ղ չներկայանա, որ քաղաքական գործիչ է: Այս հրապարակում քաղաքականություն գոյություն չունի»:
Կարդացեք նաև
Դատական նիստի ավարտից հետո փաստաբան Արա Զաքարյանը հայտարարեց, որ հայցը մերժվել է: Փաստաբանը նշեց նաև, որ անօրինական է համարում դատարանի որոշումը. «Դատարանը պարտավոր էր համաներման հանգամանքը հաշվի առնելով ազատել նաև կալանքից: Համաներման առկայությունը արդեն նշանակում է, որ Վոլոդյա Ավետիսյանը չի կարող պատիժ կրել»:
Փաստաբանը նշեց, որ որոշումը բողոքարկվելու է Վճռաբեկ դատարանում, իսկ եթե հայցը նորից մերժվի, ապա նաև Մարդու իրավունքների եվրոպական դատարանում: Դատարանի պատճառաբանությունները 3 օրվա ընթացքում պետք է տրամադրվի փաստաբանին:
Ազատամարտիկի կողմնակիցները փորձեցին մտնել դատարան, սակայն փաստաբան Արա Զաքարյանի և մի քանի ազատամարտիկների հորդորով, հետ կանգնեցին այդ մտքից:
Ազատամարտիկ Կարեն Մելիքբեկյանը լրագրողների հետ զրույցում նշեց, որ իշխանությունը այդպես փորձում է շարժումը գլխատել.
«Ամբողջ այս շինծու գործերը, սադրանքները, որոնք կատարվում են կոնկրետ ազատամարտիկ տեսակի նկատմամբ, նշանակում է, որ մենք ապրում ենք անօրեն պետության մեջ՝ օրենք գոյություն չունի»:
Ամի ՉԻՉԱԿՅԱՆ
