«Երկիր» թերթն այսօր հարցազրույց է հրապարակել ԼՂՀ փոխվարչապետ Արթուր Աղաբեկյանի հետ:
-Պարո’ն Աղաբեկյան, ավարտվեց «Հայաստան» համահայկական հիմնադրամի կազմակերպած հերթական հեռուստամարաթոնը: Արդեն հայտնի է, թե ինչքան գումարի խոստում է տրվել: Ինչպե՞ս կգնահատեք այս տարվա արդյունքները:
– Պետք է խոստովանեմ, որ մեր ակնկալիքն ավելին էր, որովհետև մենք նպատակ ունենք 2014թ. փետրվարից սկսել Մարտակերտ-Քարավաճառ-Վարդենիս ճանապարհի կառուցման աշխատանքները: Դրա մասին երկար խոսելու անհրաժեշտություն չկա: Կարծում եմ, որ, մեկ անգամ նայելով քարտեզին, կհասկանաք, թե ինչ նպատակ է հետապնդում Արցախը` ունենալով այդ ճանապարհը: Մենք ակնկալում էինք, որ մեր ժողովուրդը կանի ամեն ինչ, որ այդ գումարը, որը 30 մլն ԱՄՆ դոլարին համարժեք է, հավաքվի: Իհարկե, մի քիչ պակաս հավաքվեց, բայց լիահույս ենք, որ տարվա ընթացքում, այլ բարերարների աջակցությամբ, այդ գումարը կհամալրվի: Ամեն դեպքում մենք ունենալու ենք այդ ճանապարհը, որը Արցախի համար ռազմավարական մեծ նշանակություն ունի: Մենք փետրվարին կսկսենք ճանապարհի կառուցումը և մեկուկես տարի հետո կունենանք այն: Ուզում եմ շնորհակալություն հայտնել բոլոր նրանց, ովքեր իրենց սուղ միջոցներից մաս հանեցին և մասնակցեցին այս ծրագրին:
Կարդացեք նաև
– Արդեն ավարտին է մոտենում Արցախի կառավարության կազմակերպած` վիճակախաղի տոմսերի վաճառքի ժամանակը: Կարո՞ղ եք ասել` ինչքա՞ն վիճակախաղի տոմս էր թողարկվել և ինչքա՞նն է վաճառվել:
– Մենք թողարկել էինք 300 000 վիճակախաղի տոմս և բոլորն էլ դրել շրջանառության մեջ: Այսօրվա դրությամբ` 200 000-ից ավելին արդեն իրացված է, իսկ եթե դրանց գումարեմ նաև Սփյուռքում Հայ Յեղափոխական Դաշնակցության կառույցների կողմից տարածված տոմսերի թիվը, որոնց մասին արդեն սպառիչ տեղեկություն կստանանք մոտ օրերս, ապա կարելի է հայտարարել, որ համազգային առաջին վիճակախաղը հաջողել է: Մնում են ավարտական մի քանի միջոցառումներ, որպեսզի դեկտեմբերի 28-ին պատվով, թափանցիկ իրականացնենք խաղարկությունը: Այս վիճակախաղի նպատակը հանրապետությունում կարևոր երկու ծրագրերի իրականացումն է` նպաստել Արցախի վերաբնակեցման ծրագրին և մշակութային արժեք ներկայացնող գորգերի արտադրությանը, որով, բնականաբար, նաև աշխատատեղերի հարց է լուծվելու: