Ինչպես արդեն տեղեկացրել ենք, այսօր, մինչեւ ԱԺ հերթական քառօրյայի սկսելը, Ազգային ժողովի չորս խմբակցություններ՝ ԲՀԿ, ՀՅԴ, ՀԱԿ եւ «Ժառանգություն» ԱԺ քարտուղարություն են ներկայացրել ձեւաթուղթ՝ 49 պատգամավորի ստորագրությամբ, ինչը, օրենքի համաձայն թույլ կտար իրենց՝ իմպերատիվ կարգով ԱԺ քառօրյայի օրակարգ մտցնել եւ քննարկման դնել իրենց օրենքի նախագիծը: Խոսքը տվյալ դեպքում կենսաթոշակային բարեփոխումներին վերաբերվող օրենքի կիրառումը մեկ տարով հետաձգելու մասին պատգամավորների պահանջի մասին է:
Խոսելով կենսաթոշակային բարեփոխումների մասին՝ ՀՅԴ պատգամավոր Արծվիկ Մինասյանն անդրադարձավ այն խնդիրներին, որ այսօր կանգնած են կենսաթոշակային համակարգի առջեւ, ընդունեց, որ կար բարեփոխումների անհրաժեշտություն, սակայն վստահեցրեց, որ այս նոր համակարգը ոչ միայն չի լուծում այն խնդիրները, որոնք կային, այլեւ նոր խնդիրներ է առաջ բերում: Նկատենք, որ բարեփոխումների կարիքը կառավարությունը բացատրում է մասնավորապես ժողովրդագրական խնդիրներով: Ներկայումս մենք կանգնած ենք այն փաստի առջեւ, որ յուրաքանչյուր աշխատողի բաժին է ընկնում մեկ թոշակառու, եւ այս պայմաններում ներկայիս համակարգը, որն առաջնորդվում է «Սերունդների համերաշխության» սկզբունքով, չի արդարացնում իրեն, իսկ մի քանի տարի հետո, ժողովրդագրական նույն պայմաններում կկանգնենք փաստի առաջ, որ յուրաքանչյուր աշխատող ստիպված պիտի լինի իր վճարած հարկերով «պահել» ոչ թե մեկ, այլ ավելի թոշակառուի: Դա նշանակում է, որ մի քանի տարի հետո, եթե չլինեն բարեփոխումները, աշխատողների վրա հարկային բեռը սարսափելի ծանր է լինելու:
Այս մասին խոսեցին, ըստ էության, գրեթե բոլոր ելույթ ունեցողները:
Մասնավորապես, անկախ պատգամավոր Էդմոն Մարուքյանն էլ նկատեց, որ խնդիրը հասկանալի է, եւ ընդհանուր առմամբ բարեփոխման կարիքը հաստատ կա, սակայն գլխավոր պրոբլեմն այն է, որ ժողովուրդն ուղղակի չի վստահում իշխանություններին, եւ ինչ էլ որ անի իշխանությունը՝ անվստահությամբ եւ սվիններով է ընդունում:
Կարդացեք նաև
Ի դեպ, դա խոստովանեց իր խոսքում նաեւ ՀՀԿ-ն ներկայացնող պատգամավոր Հակոբ Հակոբյանը, որն ասաց. «Ժողովուրդը չի ուզում մեզ լսել, որովհետեւ իրենց հետ խոսելու միակ ձեւը կառավարությանը քննադատելն է: Հանրությունը ոչ թե կուտակայինին է դեմ, այլ մեզ է դեմ: Դա անվստահություն չի նոր կենսաթոշակային համակարգի հանդեպ, դա անվստահություն է մեր հանդեպ»:
Պարոն Հակոբյանը որպես կառավարության հաջողված նորամուծություններ հիշեցրեց ԱՊՊԱ համակարգի ներդրումը, սոցփաթեթների ներդրումը, որոնց ժողովուրդն էլի դեմ էր, սակայն հետո տեսավ, որ ընդունելի նորամուծություններ են:
Մելանյա ԲԱՐՍԵՂՅԱՆ
Տեսանյութը՝ ԱԺ մոնիտորինգ-ի
