Ինչպես արդեն հայտնել ենք, ՀՀ ոստիկանությունը, «Հայկական ժամանակ» օրաթերթի հարցմանն ի պատասխան, տեղեկացրել էր, որ Կոմիտաս 5-ում ակտիվիստ աղջկա պարանոցը համբուրած ոստիկանի` Հակոբ Խաչատրյանի լիազորությունները վերականգնվել են, հայտարարվել է ընդամենը նկատողություն:
Նկատողությունը, ըստ ոստիկանության, հայտնել են պարտականությունները ոչ պատշաճ կատարելու, մասնագիտական ցածր պատրաստակամություն դրսևորելու համար:
Մեր հարցին, թե ոստիկանի պարտականությունները ոչ պատշաճ կատարելը որքանո՞վ կապ ունի համբույրի հարցով սկսված ծառայողական քննության հետ, ոստիկանությունից հայտնեցին, թե ավելին, ինչ գրված է իրենց հաղորդագրության մեջ՝ չեն կարող ասել:
Մեր հարցին, այսինքն ծառայողական քննության արդյունքում պարզվեց, որ ոստիկանը չի՞ համբուրել աղջկան, ՀՀ ոստիկանության հասարակայնության հետ կապի եւ լրատվության վարչության պետ Աշոտ Ահարոնյանն ասաց. «Ո՞վ ասաց նման բան»:
Ծառայողական քննության վերաբերյալ այլ մանրամասները ոստիկանությունից չեն հայտնում:
Արփինե ՍԻՄՈՆՅԱՆ
