ՀՀ սպորտի և երիտասարդության հարցերով աշխատակազմի նախկին ղեկավար Վահե Էլոյանի հայցով դատական հերթական նիստը Կենտրոն և Նորք-Մարաշ վարչական շրջանների ընդհանուր իրավասության դատարանում այսօր տևեց 10 րոպե: Հայցվորի ներկայացուցիչը հարցեր ուղղեց կառավարության ներկայացուցիչ Ռաշիդ Գալստյանին, մասնավորապես, աշխատանքային հարաբերությունների դադարեցման հիմքերի շուրջ: Հայցվորի ներկայացուցիչը ուզում էր ճշտել, թե ինչպես կարող է որոշում լինել ազատման մասին, երբ մեկ օր առաջ եղել է այլ հրաման Վահե Էլոյանին նախարարի օգնական նշանակելու մասին: Ռաշիդ Գալստյանը նշեց, որ եղել է փոխադարձ բանավոր համաձայնություն և եթե ըստ նրա՝ չլիներ այդ համաձայնությունը, ապա Վահե Էլոյանն իր ծառայողական մեքենան, ծառայողական գույքը կհանձներ ոչ թե երկու շաբաթ անց, այլ հենց հաջորդ օրը:
Դատավոր Գայանե Կարախանյանի հարցին, թե այդ հանձնման վերաբերյալ կա՞ր որևէ փաստաթուղթ, պատասխանողը ասաց, որ ոչ: Կողմերն այլևս հարցեր չունեին, և դատարանը գալիք տարվա հունվարի 31-ին կհետազոտի այն ապացույցները, որոնք կներկայացնեն կողմերը:
Ռուզան ՄԻՆԱՍՅԱՆ
