«Այսօր ՀՀ-ում տիրում է սահմանադրական ճգնաժամ»,-«Հենարան» մամուլի ակումբում լրագրողների հետ հանդիպմանը հայտարարեց «Դեմ եմ» նախաձեռնության անդամ, իրավաբան Գևորգ Հայրապետյանը:
Նա նշեց, որ ՍԴ-ի որոշումը մարդկանց հնարավորություն է տվել ոչ միայն չընտրել, այլ նաև, որ իր փոխարեն չեն կարող ընտրել:
Անդրադառնալով այն իրավիճակին, երբ մի շարք գործատուներ պահում են այդ հինգ տոկոսները, պարոն Հայրապետյանն ասաց. «Արվում է մի գործողություն, որը կուտակային կենսաթոշակների մասին օրենքով չի կարգավորվում: Սա կամայականություն է, ուղղակի վերևից ասված մի բան»:
Իրավաբանը քաղաքացիներին խորհուրդ է տալիս պարզ դիմումով, գրավոր, սեփական բառերով դիմել գործատուին ու խնդրել, որ չփոխանցվի: Իսկ եթե դրանից հետո ճնշումն ավելի ուժեղանա, ապա գոյություն ունեն վարչարարության և վարչական վարույթի մասին օրենքներ, որոնք պարունակում են դիմումի ձևերը և այդ կետերը պահպանելով՝ կարելի է սեփական բառերով պահանջը, խնդրանքը ձևավորել ու դիմել պետական մարմնին և սկսել վարույթներ: Թող արդեն վարչարարությունն իրականացնող մարմինը հարցի լուծումը քննի, բազմաթիվ դիմումներ քննի և հարցի պատասխանը տա: Եթե նրանք այդպիսի պայման են պարտադրել, թող այդ պարտադրանքի պատասխանատվությունը կրեն»:
Կարդացեք նաև
«Դեմ եմ» նախաձեռնության անդամ Դավիթ Խաժակյանը վստահեցրեց. «Նորմատիվ ակտերի իրավական հետևանքից ազատել է սահմանադրական դատարանը, դա նշանակում է, որ այդ օրենքը կասեցված է: Գործատուների վրա պարտավորություն չկա դրված գումար փոխանցելու: Եթե պարտադիր են, ապա երկուսը միասին, եթե կասեցվել են, երկուսը միասին: Տվյալ պահին գործատուները ազատված են որևէ պարտադիր գումար փոխանցելուց: Եթե գումար չեն փոխանցում ֆոնդերին ու կամուրջ հաշվին, ապա որևէ պատասխանատվության չեն ենթարկվում»:
Տաթև ՀԱՐՈՒԹՅՈՒՆՅԱՆ
