Ազգային ժողովն այսօր շարունակում էր լսել Հանրային ծառայությունները կարգավորող հանձնաժողովի 2014թ. ծրագիրը: Հանձնաժողովի նախագահ Ռոբերտ Նազարյանը պատասխանեց պատգամավորների տված եւս մի քանի հարցերի: Մասնավորապես, Որոտան ՀԷԿՀ-ի ներկա գործունեության մասին հարցին ի պատասխան, նա ասաց, որ այս պահին Որոտանը շարունակում է իր լիցենզավորված գործունեությունը, իսկ երբ գույքի վաճառքի մասին պայմանագրի համաձայն Որոտանի գույքը կդառնա այլ ընկերության սեփականություն, կդիմեն իրենց հանձնաժողովին, նոր լիցենզիա կստանան եւ կշարունակեն արտադրել էլէներգիա:
Պատգամավոր Խոսրով Հարությունյանն իր ելույթում առաջարկեց հանձնաժողովին՝ ցածրացնել գազի սակագները: Եվ այդ պարագայում գազի սպառումը կմեծանա: Այնինչ, ըստ պատգամավորներ Խոսրով Հարությունյանի եւ Հովհաննես Մարգարյանի, գազի սպառման ծավալը գնալով նվազում է, քանի որ մարդիկ հաշվարկել են, որ էլեկտրականությունն ավելի էժան է նստում, քան գազը: Խ. Հարությունյանը կարծում է, որ ներկայումս սպառվող մոտ 1 մլն խորանարդ մետր գազը լրիվ չի բավարարում պահանջարկը, սակագների նվազման դեպքում սպառման ծավալները կարող են կրկնապատկվել: Հիշեցնենք, որ «Գազպրոմի» հետ դեկտեմբերին կնքած պայմանագրի համաձայն՝ Հայաստանը պարտավորվել է չնվազեցնել գազի սպառումը:
Իր ելույթում հարակից զեկուցողը՝ ԱԺ տնտեսական հարցերի մշտական հանձնաժողովի փոխնախագահ Միքայել Մելքումյանը, ասաց, որ իրենց հանձնաժողովը դրական եզրակացություն է տվել ՀԾԿՀ-ի 2014թ. ծրագրին:
Միքայել Մելքումյանին պատգամավոր Հրանտ Բագրատյանը հարցրեց՝ արդյո՞ք «Գազպրոմի» հետ կնքած պայմանագրով, համաձայն որի՝ մեր երկիրը պարտավորվել է ապահովել գազի սպառման չնվազող ծավալ, մեր երկրում մինչ այժմ եղած արեւային էներգիայի, քամու էներգիայի կայաններ կառուցելու ծրագրերը առնվազն երեսուն տարով «թաղվում են»: Միքայել Մելքումյանը ի պատասխան նկատեց, որ իսկապես «Գազպրոմի» հետ պայմանագրի 7-րդ կետը ըստ էության քաղաքական պահանջ է պարունակում՝ պահպանել այն ստատուս քվոն, որ կա այս պահին՝ գազի սպառման ծավալների, հարկերի ոչ մի փոփոխություն երեսուն տարվա ընթացքում: Ըստ տնտեսական հանձնաժողովի փոխնախագահի՝ հարցն իրոք մտահոգիչ է, եւ կառավարությունը պետք է այդ հարցի պատասխանը տա:
Մելանյա ԲԱՐՍԵՂՅԱՆ
