Ավելի քան 5 ամիս է, ինչ Նոյեմբերյան քաղաքում գործում է համալիր սոցիալական ծառայությունների տարածքային կենտրոն: Դրա հանդիսավոր բացման ժամանակ՝ 2013 թվականի սեպտեմբերի 24-ին ՀՀ աշխատանքի եւ սոցիալական հարցերի նախարար Արտեմ Ասատրյանը եւ Տավուշի մարզպետ Արմեն Ղուլարյանը հայտարարեցին, որ կենտրոնում գործելու է «մեկ» պատուհանի» սկզբունքը, ինչը դյուրացնելու է բնակիչներին սոցիալական ծառայությունների մատուցումը: Սակայն «մեկ պատուհանի» սկզբունքն այդպես էլ չի ներդրվել, համալիր կենտրոնը կազմող տարբեր ծառայությունները գործում են նույն՝ հին ձեւով, առանձին-առանձին: Համալիր կենտրոնի բացման ժամանակ նախարար Արտեմ Ասատրյանին հարցրեցինք, թե ինչպե՞ս է լուծվելու կենտրոնի ջրամատակարարման հարցը, չէ՞ որ նորաստեղծ հիմնարկի սանիտարական հանգույցներից օգտվելու են ոչ միայն դրա աշխատակիցները, այլեւ այցելուները, այդ թվում՝ հաշմանդամներ: Նոյեմբերյան քաղաքում խմելու ջուր է մատակարարվում օրական մի քանի ժամ՝ վաղ առավոտյան եւ երեկոյան: Նախարարն ասաց, որ կտեղադրվի ջրի բաք, եւ այդ ձեւով ջրի խնդիրը կլուծվի: Համալիր կենտրոնի գործարկումից անցել է ավելի քան հինգ ամիս, սակայն ջրի բաք չի տեղադրվել:
Լուծված չէ շենքի տանիքից անձրեւաջրերի հեռացման հարցը: Տեղումներից հետո ջրհորդաններից թափվող ջրերը լցվում են շենքի հիմքերը՝ խարխլելով կառույցը: Համալիրի կենտրոնի ջեռուցման համակարգը խափանվել է , այն չի գործում, կենտրոնի աշխատողները ցրտից կուչ են գալիս: Չեն գործում կենտրոնում տեղադրված հեռախոսները, շենքը չունի պահակ, հավաքարարներ: Կենտրոնի փաստաթղթերի արխիվը տնօրինելու համար չկա աշխատող, ինչը շատ բարդացնում է փաստաթղթերի պահպանության գործը, կենտրոնի միջանցքում դրված են փաստաթղթերով մեծ ցելոֆաններ:
Համալիրի հանդիսավոր բացման ժամանակ նախարար Արտեմ Ասատրյանը մեր հարցին պատասխանելով՝ ասաց, որ կենտրոնի գործարկման համար ծախսվել է 100-150 հազար դոլար, որի մեծ մասը՝ վարկային միջոցներից, մնացածը ՝ պետական բյուջեից: Փաստորեն 100-150 հազար դոլար ծախսվել է միայն նախկինում՝ 1998թ. որակյալ կերպով հիմնանորոգված շենքը նորից նորոգելու եւ այն կահավորելու համար: Մեր տեղեկություններով՝ Հայաստանում գործում են թվով 19 համալիր սոցիալական ծառայությունների տարածքային կենտրոններ:
Ոսկան ՍԱՐԳՍՅԱՆ
Նա ճառ ասի, թե*զանգ կախի…
Մահն է չոքել դռանը,
Ձեր գնդապետ մռռանը,
Նմանակն է գազանի,
Մարզը լափի, տազ անի,
Պատերազմում շախ անի,
Վերջը հաստատ ճոխ լինի: