Թուրքիայի նախագահ Աբդուլա Գյուլը դատապարտել է սոցիալական ցանցերի սահմանափակումների մասին որոշումը, որի համաձայն՝ Թուրքիայում արգելափակվել է «Թվիթերը»: Հայտնում է «Հուրիեթ» թերթը:
«Սոցիալական ցանցերի համատարած արգելափակումը չի կարող հավանության արժանանալ», – մարտի 21-ին գրել է Գյուլը «Թվիթերի» իր էջում՝ հույս հայտնելով, որ կառավարությունը կվերանայի իր որոշումը:
«Թվիթերի» մուտքը Թուրքիայում փակվել է մարտի 20-ին՝ վարչապետ Ռեջեփ Թայիփ Էրդողանի ընտրական քարոզարշավի ելույթից հետո, որում նա խոստացել էր քայլեր ձեռնարկել սոցիալական ցանցի դեմ:
«Մենք այժմ ունենք դատարանի որոշումը: Մենք կվերացնենք «Թվիթերը»: Ինձ չի հետաքրքրում, թե ինչ կասի միջազգային հանրությունը: Բոլորը կտեսնեն Թուրքիայի Հանրապետության ուժը», – ասել էր Էրդողանը:
Կարդացեք նաև
Թուրքիայի տեղական ինքնակառավարման մարմինների ընտրությունների քվեարկությունը տեղի է ունենալու մարտի 30-ին:
Պատրաստեց Հովհաննես ԻՇԽԱՆՅԱՆԸ
