Ինչպես արդեն տեղեկացրել էինք, «Բանդայի գործով»ամբաստանյալ Քյարամ Ամոյանի հայրն էր մահացել:
Երեկ հանգուցյալին չամփոփեցին հողում, որովհետեւ Ամոյանի հարազատները ակնկալում էին, որ արդարադատության նախարարության «Դատապարտյալների հիվանդանոցում»գտնվող Ամոյանին թույլ կտան վերջին հրաժեշտը տալ հորը:Այսօր հանգուցյալի թաղման օրն է:
Ամոյանի պաշտպանը` Սամվել Հովհաննիսյանը հարցիս, թե արդյոք դիմել է Կենտրոն եւ Նորք-Մարաշ վարչական շրջանների ընդհանուր իրավասության դատարան, պատասխանեց, որ մահվան վկայականը ներկայացրել է քրեակատարողական հիմնարկների վարչության պետ Հայկ Հարությունյանին, իսկ դատարան չի դիմել, քանի որ բանդիտիզմի հոդվածով ամբաստանվողների նկատմամբ չի տարածվում վերոհիշյալ մարդասիրական թողտվությունը:
Քյարամ Ամոյանի նկատմամբ նշանակվել է դատահոգեբուժական ստացիոնար փորձաքննություն, նա սահմանափակ մեղսունակ է ճանաչվել, նրա գլխուղեղային հիվանդությունը հնարավորություն չի տալիս արդեն վեց ամիս, որպեսզի նա մասնակցի դատական նիստերին:Փորձաքննությունից հետո չի բացառվում նրա մասով անջատվի գործի վարույթը:
Մեր տեղեկություններով, Ամոյանը անվերջ լալիս է, նա ներփակվել է իր մեջ, եւ դատապարտյալների հիվանդանոցում ներկայումս մտահոգված են նրա առողջական վիճակով:
Ռուզան ՄԻՆԱՍՅԱՆ
