«Եթե այդքան զիջումների են գնացել, ուրեմն ունեն նպատակ՝ քաղաքացիական ուժերի ճնշումը թուլացնելու համար և չէի ասի, որ իրենք այսօր դա մեծ ուրախությամբ են անում»,-անդրադառնալով «կուտակային» լրամշակված օրենքի ընդունմանը՝ այսպիսի կարծիք հայտնեց ԱԺ «Ժառանգություն» խմբակցության քարտուղար Թևան Պողոսյանը:
Նշենք, որ շատերն են պնդում, թե կառավարությունն իր այս քայլով ոչ թե զուտ խնդիր էր դրել բավարարել քաղաքացիների դժգոհությունը և հաշվի առնելով նրանց կարծիքը, այլ զուտ կրքերը հանդարտեցնել: Որպես վկայություն` պարոն Պողոսյանը հիշեցնում է ՀՀ կառավարության և ԱԺ-ի վարքագիծը. «Այսօրվա կառավարությունը նույն այն կառավարությունն է, որը նոյեմբերին չցանկացավ մասնակցել այս թեմայով արտահերթ քննարկմանը, որևէ զիջում չէր ընդունում, մինչև խնդիրը չհասավ Սահմանադրական դատարան»:
Aravot.am-ի դիտարկմանը, թե եթե նշվում է, որ կառավարությունը քաղաքացիական շարժումը հանդարտեցնելու խնդիր է լուծում, արդյոք դա նշանակո՞ւմ է, որ ՀՀ նորանշանակ վարչապետ Հովիկ Աբրահամյանին հաջողվում է հաշտարարի դերը ստանձնել` հաշվի առնելով այն, ըստ էության նրա նշանակման ժամանակ հիմնականում նրան այս պարտականությունն էր վերագրվում: Թևան Պողոսյանը պատասխանեց. «Չեմ կարծում, թե երբևէ խնդիրը դրված է եղել հաշտարար-չհաշտարար հարթության վրա: Հովիկ Աբրահամյանն այսօր զբաղեցնում է վարչապետի պաշտոնը և պետք է կառավարի: Եթե նայենք այդպես, ապա առաջին քայլը ՍԴ որոշումն էր, քանի որ ՍԴ-ն այդ դրույթները ճանաչել է հակասահմանադրական և կառավարությանը պարտադրել բոլոր ուժերի հետ միասին նոր օրենք մշակել: Մնացածը գործընթաց է, որ գնում է: Մենք համարում ենք, որ այսօրվա օրենքը կիսատ լուծում է, որը չի նպաստում հարցի լուծմանը: Մեր պրակտիկայից ելնելով` կիսատ լուծումները դեպի դրականը չեն տանում»:
Տաթև ՀԱՐՈՒԹՅՈՒՆՅԱՆ
