Մեր երկրի համար որոշ վարակիչ հիվանդություններ դեռ սպառնալիք են
Վարակիչ հիվանդությունների եւ դրանց փոխանցողների դեմ պայքարելու համար, վաղը կառավարությունում առողջապահության նորանշանակ նախարար Արմեն Մուրադյանը կներկայացնի ծրագիր եւ 2014-2018 թվականների միջոցառումների ցանկը: Այս մասին տեղեկանում ենք կառավարության նիստի օրակարգից: Ըստ Առողջապահության համաշխարհային կազմակերպության տվյալների՝ փոխանցողներով տարածվող հիվանդությունները կազմում են վարակիչ հիվանդությունների համաշխարհային բեռի 16%-ը:
Կառավարական փաստաթղթում նախարարը վստահեցնում է, որ «փոխանցողների դեմ պայքարը երբեմն այդ հիվանդությունների դեմ պայքարի միակ եւ արդյունավետ եղանակն է»:
Պարոն Մուրադյանի համոզմամբ, վարակիչ հիվանդությունների տարածմանը նպաստում է միջազգային ճանապարհորդությունների եւ բեռնափոխադրումների աճող ծավալը, կլիմայի գլոբալ տաքացումը եւ այլն:
Կարդացեք նաև
Մեր երկրում տարածված են եղել փոխանցողներով պայմանավորված մի շարք հիվանդություններ, մասնավորապես՝ մալարիան, լեյշմանիոզը, մլակային տենդը, հետադարձ տիֆը, բծավոր տիֆը, ժանտախտը, տուլարեմիան եւ այլն: Նախարարը վստահեցնում է, սակայն, որ ներկայումս դրանցից շատերը հանրապետությունում չեն արձանագրվում:
Հայաստանի ողջ տարածքում տարածված վարակիչ հիվանդությունների փոխանցողներից են մոծակները, մլակները, լվերը, ոջիլները, տզերը, որոնք կարող են պատճառ դառնալ հանրապետությունում արձանագրվող տարափոխիկ հիվանդությունների առկա համաճարակային իրավիճակի բարդացմանը:
Լուսինե ԲՈՒԴԱՂՅԱՆ
