Հունիսի 20-28-ը Կազանում անցկացվելու է ծանրամարտի աշխարհի երիտասարդական` մինչեւ 20 տարեկանների առաջնությունը, որին Հայաստանը մասնակցելու է տղաների ոչ ամբողջական կազմ ունեցող թիմով:
Առաջնությանը նախապատրաստվում են 69 կգ քաշայիններ, գյումրեցիներ Ժորժ Եղիկյանն ու Վարդան Միլիտոսյանը եւ 105 կգ քաշային Մկրտիչ Մկրտչյանը:
Հայաստանի ծանրամարտի ֆեդերացիան մրցավայր գործուղվող ծանրորդների թվաքանակի հետ կապված խնդիրներ չունի: Հարցն այն է, որ այստեղ որդեգրել են հետեւյալ սկզբունքը. պաշտոնական առաջնություններին պետք է մասնակցեն նրանք, ովքեր ի վիճակի կլինեն նորմալ ու արժանապատիվ հանդես գալ: Այնպես որ, եթե մարզիչները համարեն, որ վերոնշյալ երեք ծանրորդներն էլ պատրաստ են, բոլորն էլ կմեկնեն:
Հայ մարզասերները սովորել են, որ մեր տարբեր տարիքային խմբերի հավաքականները պաշտոնական առաջնություններում գրեթե միշտ հանդես էին գալիս ամբողջական կազմերով: Սակայն հիմա, ինչպես ասացինք, վերաբերմունքը մի փոքր այլ է: Նրանք, ովքեր Կազանից առաջ դեռ պատշաճ մարզավիճակում չեն, շարունակում են մարզվել` նախապատրաստվելով նոյեմբերին Կիպրոսում կայանալիք Եվրոպայի մինչեւ 20 եւ 23 տարեկանների առաջնությանը:
Հարց կարող է առաջանալ, թե մեր աղջիկներն այս անգամ ինչու՞ չեն մասնակցում աշխարհի երիտասարդական առաջնությանը: Մոտեցումը կրկին նույնն է: Մեր ունեցածը հիմնականում պատանի աղջիկներն են եւ մեծահասակները: Վերջինները պատրաստվում են տարվա գլխավոր մեկնարկին` աշխարհի առաջնությանը: Եվ նրանք, ովքեր դեռ 20 տարեկան են, պետք է օգնեն մեծերին` յոթ քաշային կարգերը լրացնելու եւ 2016 թվականի օլիմպիական խաղերի` հնարավորին չափ շատ վարկանիշային միավորներ հավաքելու համար:
Կարդացեք նաև
Ա. ՀԱԿՈԲՅԱՆ
«Առավոտ» օրաթերթ
28.05.2014
