Ստրասբուրգի քաղաքապետարանը փողոցներից հանում է Ադրբեջանի վերաբերյալ գովազդային վահանակները, որոնք տեղադրվել են Եվրախորհրդի նախարարների կոմիտեում Ադրբեջանի նախագահությունը ստանձնելու կապակցությամբ, գրում է «Haqqin.az»-ը՝ հղում անելով ստրասբուրգյան «Dernieres Nouvelles d’Alsace» թերթին:
2009թ. սկսած Ստրասբուրգի փողոցներն ու հասարակական տրանսպորտը զարդարում են այն երկրի մասին հիշեցնող գովազդներով, որը ստանձնում է ԵԽ նախարարների կոմիտեի նախագահությունը, ինչպես նաև այդ երկրի մշակույթի և պատմության մասին միջոցառումներ են անցկացվում:
Սակայն, այն բանից հետո, երբ Ադրբեջանը ԵԽ-ում Ֆրանսիայի ներկայացուցիչ, Վեհաժողովի փոխնախագահ Ռընե Ռուքեին թույլ չտվեց մեկնել Բաքու, քանի որ նա նախկինում այցելել էր Ղարաբաղ, ֆրանսիական քաղաքը որոշել է այսպես պատժել Ադրբեջանին:
Ստրասբուրգի քաղաքապետարանի պաշտոնական ներկայացուցիչ Նավել Ռաֆիկը թերթին ասել է, որ իրենք չէին կարող երկրի գովազդները հեռացնել միայն այն բանի համար, որ այնտեղ խախտվում են մարդու իրավունքները. «Բայց Ռընե Ռուքեի դեմ ադրբեջանական պատժամիջոցների պատճառով խախտվել է ԵԽ աշխատանքը, ու մենք չէինք կարող անտարբեր մնալ այս հարցում», – ասել է նա:
Կարդացեք նաև
Բացի գովազդներից, նաև չեղյալ են հայտարարվել Ադրբեջանի մշակույթի և պատմության մասին ուսուցողական միջոցառումները:
Պատրաստեց Հովհաննես ԻՇԽԱՆՅԱՆԸ
