Ժողովրդագիր Ռուբեն Եգանյանի համոզմամբ, ԱՊՀ միգրանտների մուտքը ՌԴ
երեքից հինգ տարով արգելափակելու որոշումը ծանր ազդեցություն կունենա հայ միգրանտների վրա:
«Այդ մարդիկ հայտնվել են անելանելի վիճակում: Հայաստանի աշխատանքային շուկան հնարավորություն չունի նման ահռելի զանգվածի աշխատանքով ապահովել, չեմ կարող ենթադրել՝ ինչ կլինի այդ մարդկանց վիճակը: Որ վատ կլինի, դա հաստատ: Լուծումներ չեմ տեսնում այս պահին»,- այսօր «Բլից ինֆո» ակումբում ասաց ժողովրդագիրը:
Հրապարակախոս Կարինե Հակոբյանն էլ կարծում ՝ ՌԴ-ն միգրանտների մուտքը երեքից հինգ տարով արգելելու որոշմամբ իր շահերն է հետապնդում. «Ժողովրդագրական հարց է լուծում: Ուզում է այն մարդիկ, որոնք գնում են իրենց մոտ աշխատելու, դառնան ՌԴ քաղաքացի: Այդ օրենքների փոփոխությունները տանում են դրան»:
Կարդացեք նաև
Նրա խոսքով, արդյունքում մեծանում է Հայաստանից արտագաղթողների թիվը. «Ո՞րն է մեր շահը, պետք է մեր քաղաքականությունը փոխենք, որ արտագաղթը կանգնեցնենք: Արտագաղթը հետեւանք է տնտեսության ճգնաժամի, գյուղի քայքայման, մինչեւ այդ ամենը չփոխենք, արտագաղթը չի նվազի, գնալով ահագնանում է, ոչ մի լուրջ քայլ չի արվում, գյուղը շարունակում է քայքայվել, գյուղատնտեսությունն էլ չի ընդունվում կառավարության կողմից որպես գերակա շահ»:
Տիկին Հակոբյանի համոզմամբ, պետք է Հայաստանից արտագաղթողներին պարբերաբար տեղեկացնել, որ իրենց դրսում դրախտը չի սպասում. «Պետք է ասել հասարակությանը, որ ճգնաժամը միայն Հայատանում չէ, այլ ամբողջ աշխարհում: Մարդիկ երբեմն գնում են նաեւ ի նշան բողոքի՝ իրենց շրջապատից ամաչելով, արտասահմանում աղքատությունը տանելն ավելի հեշտ է: Մինչեւ հիմա արտագաղթը չեն դիտարկում որպես հետեւանք եւ չեն փորձում պատճառները վերացնել»:
Ժողովրդագիրն էլ այն կարծիքին է, որ աշխատանքային միգրացիա երեւույթի հետ պետք է Հայաստանում համակերպվել, որովհետեւ. «Մեր շուկան հնարավորություն չունի ողջ աշխատուժը կլանելու, աշխատանքի վաստակի մեծության եւ աշխատատեղի խնդիր կա: Մարդկանց հսկայական մասը գնում է Հայաստանից, որովհետեւ այդ աշխատանքը հնարավորություն չի տալիս նրանց արժանավայել ապրել»:
Արփինե ՍԻՄՈՆՅԱՆ
