Արաբկիր եւ Քանաքեռ- Զեյթուն վարչական շրջանների ընդհանուր իրավասության դատարանում դեռ շարունակվում է ազատամարտիկ Վոլոդյա Ավետիսյանի գործով դատական նիստը:
Արդեն մի քանի ժամ է, ինչ հետազոտվում են գործի ապացույց հանդիսացող ազատամարտիկի եւ վկաների հեռախոսազրույցների ձայնագրությունները, հանդիպման տեսաձայնագրությունները:
Ձայնագրություններում Վոլոդյա Ավետիսյանը տարբեր անձանց հետ զրուցում է բանակում զինծառայողներին տարբեր հարցերով աջակցելու պայմանավորվածությունների շուրջ:
Տեսագրվել էր նաեւ նրա ու գործով վկաներից մեկի հետ հանդիպումը Արմավիրում, բայց տեսագրությունը առանց ձայնի էր ու շատ կարճ: Այն դիտելու պահին դատավոր Գալստյանը ազատամարտիկից հետաքրքրվեց՝ Վոլոդյա դուք ձեզ ճանաչեցի՞ք տեսաձայնագրությունում, ազատամարտիկը պնդեց. «Սաղ սարքած է»:
Դատական նիստի ընդմիջման ընթացքում էլ պարոն Ավետիսյանը բողոքեց բանտախցի պայմաններից.« Բանտախուցը պետք է լինի չորս հոգու համար, բայց մի քանի օր առաջ ինը հոգի էինք: Հիմա մի քանի հոգու տեղափոխեցին, դարձանք վեց: Եթե մեզ մարդ ենք համարում, բանտախուցը ապրելու տեղ չէ, վերանորոգում չկա, բաղնիքը, զուգարանը նորմալ չէ»:
Կարդացեք նաև
Անդրադառնալով հեռախոսազրույցի ընթացքում «երկու տուփ սուրճ» պահանջելուն՝ նա նորից պնդեց. «Սաղ սարքած է»: Ու հենց այդ պահին էլ ընդհատվեց նրա հետ զրույցը, որովհետեւ դատավորը ներս մտավ դատական նիստերի դահլիճ:
Արփինե ՍԻՄՈՆՅԱՆ
