Ազատամարտիկ Վոլոդյա Ավետիսյանի փաստաբան Արա Զաքարյանը այսօր իր պաշտպանյալի հեռախոսազրույցների ձայնագրությունները դատարանում լսելուց հետո հայտարարեց, որ նման խոսակցություններ իր պաշտպանյալը չի ունեցել, դրանք հատուկ ծրագրով սարքած զրույցներ են:
«Լազերային սկավառակներն էլ հետազոտվեցին, բայց դրանց հետազոտումից պաշտպանական կողմի համար ակնհայտ դարձավ, որ չի կարելի լսելուց ասել Վոլոդյան խոսում էր սրա կամ նրա հետ, ինչպես անում էր դատախազը: Այս արձանագրությունները, որ քննիչը կազմել է, սոսկ լսելով հնարավոր չէ ասել՝ ովքեր են խոսում այդ ամենի մասին: Այս զննում կատարելու մասին արձանագրությունների տակ քննիչը նշել է, թե ովքեր են խոսում, ընթերականներն էլ իրենց ստորագրություններով հաստատել են: Այս արձանագրությունները ապացուցողական նշանակություն չեն կարող ունենալ: Դեռ նախաքննության ընթացքում էլ պաշտպանական կողմը կասկածի տակ էր դրել այս սկավառակների պարունակություն ունեցող նյութի արժանահավատությունը, պահանջել, որ կատարվեն անհրաժեշտ փորձաքննություններ: Իրականում նման խոսակցություններ տեղի չեն ունեցել, մեծ հավանականություն կա, որ ծրագրի միջոցով են ստացել այս ամենը»,- այսօր Վոլոդյա Ավետիսյանի գործով դատական նիստի ժամանակ ասաց փաստաբան Զաքարյանը:
Փաստաբանը նաեւ միջնորդություն ներկայացրեց ՝ ՀՀ ՊՆ նախարար Սեյրան Օհանյանին դատարան հարցաքննության կանչելու մասին. « Քանի որ վերջինս լրատվամիջոցներին տված հարցազրույցի ընթացքում ընդունել է, որ Վոլոդյա Ավետիսյանի հետ երկու հանդիպում է տեղի ունեցել ու դրանց ընթացքում ձեռք բերված պայմանավորվածությունները Վոլոդյա Ավետիսյանը խախտել է: Պաշտպանական կողմը գտնում է, որ այդ հանդիպումների արդյունքում տեղի ունեցածն է հիմք հանդիսացել Վոլոդյա Ավետիսյանի նկատմամբ դիտարկումներ ու գաղտնալսումներ իրականացնելու եւ քրեական հետապնդում հարուցելու: Մեր խորին համոզմամբ, պաշտպանության նախարարին հայտնի են այնպիսի տեղեկություններ, որոնք էական նշանակություն ունեն այս գործի համար»:
Փաստաբան Զաքարյանը նաեւ պնդեց, որ գործով ընդգրկված վկաներին բերեն դատարան հարցաքննության՝ պնդելով, որ նրանց ցուցմունքները հակասական են եղել:
Կարդացեք նաև
Դատարանը մերժեց երկու միջնորդություններն էլ: Դատական հաջորդ նիստը նշանակվեց վաղը:
Արփինե ՍԻՄՈՆՅԱՆ
