Պաղեստինի նկատմամբ Իսրայելի մոտեցման և Հիտլերի մտածողության մեջ ոչ մի տարբերություն չկա, ասել է Թուրքիայի վարչապետ Ռեջեփ Թայիփ Էրդողանը՝ Իսրայելին մեղադրելով Պաղեստինի նկատմամբ 1948թ. սկսած «պարբերաբար ոճիր գործելու և պետական ահաբեկչության» մեջ, փոխանցում է «Հուրիեթ» թերթը:
«Այն, ինչ նախորդ շաբաթվանից անում է Իսրայելը Ղազայում, բացատրություն չունի: Իսրայելը շարունակում է ահաբեկչությունը: Անհատների ահաբեկչությունից նա արդեն անցել է պետական մակարդակով ահաբեկչությանը», – ասել է նա՝ հուլիսի 15-ին խոսելով իր կուսակիցների հետ հանդիպման ժամանակ:
Էրդողանը նաև դատապարտել է միջազգային հանրությանը «անտարբերության» համար՝ ասելով, որ Արևմուտքը և միջազգային հանրությունը «անտեսում են պաղեստինցիների 1948թ. շարունակվող ողբերգությունը» և քննադատել է ԱՄՆ-ին, որ հակամարտությունը կարգավորելու համար մեծ ջանքեր չի գործադրում:
Հիշեցնելով Կնեսետի կին պատգամավոր Այալեթ Շեյքդի խոսքերը, որն ասել էր՝ «բոլոր պաղեստինցիները մեր թշնամիներն են», Թուրքիայի նախագահի թեկնածու Էրդողանն ասել է, որ այդ խոսքերի և Հիտլերի մտածողության մեջ ոչ մի տարբերություն չկա. «Եթե այս խոսքերը պաղեստինցի ասեր, ամբողջ աշխարհը կդատապարտեր այն», – ասել է նա:
Կարդացեք նաև
Պատրաստեց Հովհաննես ԻՇԽԱՆՅԱՆԸ
