Ինչպես արդեն տեղեկացրել ենք, Կենտրոն և Նորք Մարաշ վարչական շրջանի առաջին ատյանի դատարանում ընթանում է Շանթ Հարությունյան և ընկերներ գործով դատական նիստը (նախագահող դատավոր Մնացական Մարտիրոսյան):
Շանթ Հարությունյանը հայտարարեց, որ հրաժարվում է պաշտպանից և կարող է ինքն իրեն դատարանում պաշտպանել:
Այնուհետև դատարան հրավիրվեց գործով տուժող Գեղամ Խաչատրյանը: Նա հարցաքննության ընթացքում հայտարարեց, թե Շանթ Հարությունյանն իրեն փայտով հարվածել է, այնուհետև նշեց, թե Շանթ Հարությունյանի որդին՝ Շահեն Հարությունյանն իրեն հարվածել է բարձրախոսով, որից հետո ինքը տեղափոխվել է հիվանդանոց:
Գեղամ Խաչատրյանը հայտարարեց, թե Շանթ Հարությունյանը հայտարարել էր, որ գնում է Բաղրամյան փողոց, ինչը ժխտեց Շանթ Հարությունյանն ու վրդովվեց. «Որտեղի՞ց եք իմացել, որ ես ուզում եմ գնալ Բաղրամյան: Շառ եք անում…ես միայն Օսիպյանին կարող էի նման բան ասած լինել, քանի որ ես Օսիպյանի հետ եմ քայլել, իսկ իմ ընկերներն ինձնից հեռու են եղել: Ի՞նչ նպատակով եք հիմա ինձ զրպարտում»: Դատարանի հորդորին, թե մի վիրավորեք անձանց, դատավորը նշեց, թե հակառակ դեպքում, եթե նույն կարգով շարունակի, կհեռանա դատական նիստերի դահլիճից: Շանթ Հարությունյանը արձագանքեց. «Ինձ զրպարտող մարդկանց նկատմամբ ո՞նց կարող եմ հարգանքի դրսևորումներ ունենալ: Ո՞վ կարող է ապացուցել ու հաստատել, որ ես նման բան եմ ասել, թե գնում եմ Բաղրամյան: Ի՞նչ նպատակով եք ինձ զրպարտում, Ադրբեջանի, Թուրքիայի գործակա՞լ եք»:
Կարդացեք նաև
Շահեն Հարությունյանի պաշտպան Ինեսա Պետրոսյանը Գեղամ Խաչատրյանին հարցրեց՝ ինչու՞ առաջինն ինքը հրահրեց կոնֆլիկտը, Գեղամ Խաչատրյանը պատասխանեց. «Շանթ Հարությունյանը դուրս գալով փողոցի երթևեկելի մաս, խոչընդոտում էր երթևեկությանը: Շանթ Հարությունյանը չլսեց ինձ և նրա համախոհներն էլ սկսեցին հետևել նրան: Նման իրավիճակում միայն բարձր խոսելով ոստիկանները չեն կարող»:
Հետո կրկին հարցրեց՝ դուք մինչև Շանթի՝ երթևեկելի մաս դուրս գալը նախազգուշացրի՞ք, թե չի կարելի դուրս գալ երթևեկելի մաս, Գեղամ Խաչատրյանը պատասխանեց. «Նախազգուշացման խոսք անգամ լինել չէր կարող, քանի որ Շանթը ի սկզբանե հայտարարել էր, թե երթ է իրականացնում դեպի Բաղրամյան փողոց: Ես նպատակահարմար չեմ գտել, որ նրանց հորդորել, որ դուրս չգան փողոց և պարտավոր էի քայլեր ձեռնարկել; Իսկ քանի որ նախատեսված էր երթ, դրա համար միջամտություն չի եղել»:
Այնուհետև Շանթ Հարությունյանը հայտարարեց, թե «հնարավոր չէ՞ Օսիպյանը սկզբից գա, մինչև Օսիպյանը չգա չի պարզվի»:
Տաթև ՀԱՐՈՒԹՅՈՒՆՅԱՆ
