Այս պահին Ալեքսանդր Թամանյանի արձանի մոտ հավաքված մի խումբ քաղաքացիներ պատրաստվում են ի պաշտպանություն հայտնի գործարար Լեւոն Հայրապետյանի բողոքի երթ սկսել դեպի նախագահական նստավայր: Գործարարի մտերիմներից Գոհար Ներսիսյանը մեզ հետ զրույցում բացառեց փողերի լվացման մեղադրանքը եւ պնդեց, որ գործարարի ձերբակալման միակ պատճառը Ադրբեջանի քաղաքական պատվերն է: Նրա խոսքով՝ հայ-ադրբեջանական սահմանում լարված իրավիճակը եւ գործարարի ձերբակալման ժամկետները պատահաբար չէ, որ համընկնում են: Ըստ նրա՝ «ադրբեջանցիներին վախեցնում է հայ գործարարի դերն ու գործունեությունը Արցախում, ոչ միայն տնտեսական, այլեւ քաղաքական ոլորտում»:
Այստեղ հավաքվածների մեծամասնությունը նույնպես պնդում է Գոհար Ներսիսյանի տեսակետը, գործարարի ձերբակալությունը պայմանավորում են քաղաքական պատվերով:
Ի պաշտպանություն գործարարի այստեղ են նաեւ քաղաքական գործիչներ, քաղաքագետներ եւ մշակույթի ոլորտի ներկայացուցիչներ:
Քաղաքագետ Լեւոն Շիրինյանը կարծիք հայտնեց, որ գործարարի ձերբակալումը անուղղակի ճնշում է Ղարաբաղյան հիմնահարցի վրա: Բայց նա համոզված է, որ Հայաստանը գործարարի հարցում կարող է լեզու գտնել Ռուսաստանի հետ, որովհետեւ ըստ նրա՝ Ռուսաստանում կան հումանիզմի ավանդույթներ:
Կարդացեք նաև
Դերասան Միքայել Պողոսյանն էլ ասաց, որ խնդիրն այն չէ, թե ինչու են գործարարին ձերբակալել, այլ այն, թե ինչպես պետք է լուծել այդ խնդիրը. «Մենք մեզ չենք ների, եթե այդ պայմաններում նրա առողջական վիճակը վատանա: Մենք չպետք է մեր հույսը դնենք կառավարության վրա, այլ մեր արժանապատվության»:
Գործարարի մտերիմ Գոհար Ներսիսյանը պատմեց նաեւ, որ վեջին երկու օրերին Հայրապետյանի առողջական վիճակը կտրուկ վատացել է, իսկ բանտային պայմանները անմարդկային են:
Բաղրամյան 26 տանող ճանապարհին երթի մասնակիցները գոռում են՝ «Ազատություն Լեւոն Հայրապետյանին» եւ պահանջում են փոխել գործարարի կալանքի խափանման միջոցը:
Արփինե ՍԻՄՈՆՅԱՆ
Լուսանկարները՝ «Ազատություն Լևոն Հայրապետյանին» ֆեյսբուքյան էջից
