Արաբկիր եւ Քանաքեռ-Զեյթուն վարչական շրջանների ընդհանուր իրավասության դատարանի դատավոր Սիմիզար Հովսեփյանի վարույթում է գտնվում նախկին վարչապետ, ԱՄՆ-ում Հայաստանի դեսպան Տիգրան Սարգսյանի դստեր՝ Նարինե Սարգսյանի եւ խնամու՝ Հրանտ Սուվարյանի հայցն ընդդեմ Սուսաննա Դավթյանի, Լեմբերիկ Խաչատրյանի ՝ պատվի, արժանապատվությանը պատճառված վնասը փոխհատուցելու պահանջի մասին: Երրորդ անձ է ճանաչվել «Առավոտ» օրաթերթ ՍՊ ընկերությունը:
Այսօր դատարանից «Առավոտին» էին ուղարկել դատարանի որոշումը, որում մասնավորապես նշված էր. «Գործի արդյունավետ քննությունն ապահովելու նպատակով դատարանը ձեռնամուխ է եղել դատաքննության նախապատրաստությանը»: Դատաքննության օր է նշանակվել հոկտեմբերի 8-ը:
Հայցվորների դիրքորոշումը «Առավոտ» օրաթերթի եւ aravot.am-ի փետրվարի 7-ի եւ 8-ի հրապարակումների վերաբերյալ հետեւյալն է. «Հրապարակումներում նման փաստական հանգամանքների վերաբերյալ պնդումները չունեն որեւէ փաստական հիմք եւ զրպարտություն են»: «Հայցվորները գտնում են, որ քանի որ ողջ հանրությունը կարդում է «Առավոտ» օրաթերթը եւ էլեկտրոնային համանուն կայքը, չի տիրապետում բավարար իրավական գիտելիքների, արդյունքում չի կարող համապատասխան իրավական գնահատական տալ հոդվածում արծարծված հայցվորների «հավակնությունների» վերաբերյալ»:
Ինչպես տեղեկացրել ենք, ըստ հայցվորների, «Ոչ ճիշտ տեղեկատվություն» է հրապարակվել, համաձայն որի. ՀՀ նախկին վարչապետ, ԱՄՆ-ում ներկայիս ՀՀ դեսպան Տիգրան Սարգսյանի դուստրն ու ԿԲ ֆինանսական վերահսկողության պետ Հրանտ Սուվարյանն ապօրինաբար տիրացել են պատասխանողների քարե շինությանը: Այս նախադասությունն էլ հայցվորի կարծիքով, « Հասարակության կողմից ընկալվում են որպես վարչապետի դստեր եւ խնամու հակաօրինական վարքագծի դրսեւորում»:
Կարդացեք նաև
Ռ.ՄԻՆԱՍՅԱՆ
