Տեղեկատվական տեխնոլոգիաների ձեռնարկությունների միության գործադիր տնօրեն Կարեն Վարդանյանի կարծիքով, Եվրասիական տնտեսական միությանը (ԵՏՄ ) անդամակցելուց հետո Հայաստանում տեղեկատվական տեխնոլոգիաների ոլորտը կարող է ե՛ւ տուժել, ե՛ւ շահել:
«Էդքան էլ հեշտ չի լինելու էդ անդամակցելը, դրա համար հեշտ չէ դատել, թե ինչ կլինի անդամակցելուց հետո»,- այսօր «Բլից ինֆո» ակումբում ասաց պարոն Վարդանյանը:
Ըստ նրա, այսօր աշխարհի գրեթե բոլոր երկրներում տեղեկատվական տեխնոլոգիաների ոլորտի մասնագետների պակաս կա. «Ամերիկան մինչեւ 2023 թվականը մոտ մեկ մլն տեխնոլոգիական մասնագետների պակաս է զգալու: Մոտավորապես նույն իրավիճակն է նաեւ Ռուսաստանում մինչեւ 2030 թվականը: Այսինքն այսօր աշխարհի բոլոր անկյուններում տեխնոլոգիական մասնագետների խիստ պակաս է զգացվում: Եթե մենք ունենանք համապատասխան մասնագետներ եւ ձեռնարկություններ, կարողանանք բարելավել կրթական համակարգը թե դպրոցում, թե համալսարաններում, կարողանանք պատրաստել մասնագետներ, որոնք կարողանան աշխատել տարբեր շուկաներում, այդ պարագայում ապահովագրված կլինենք տարբեր տիպի վայրիվերումներից»:
Վերջում էլ հավելեց, որ ինքը ինքնիշխան պետության ստեղծման կողմնակից է. «Չնայած որ հասարակության 95 տոկոսը այսօր իր երկրին վերաբերում է որպես ֆուտբոլի երկրպագու ու ընկել է եվրոպական թե ռուսական կողմոնորշման ցավի մեջ՝ չնկատելով, որ կա նաեւ հայկական կողմնորոշում, որը ամենահզորն է, եւ որի միջոցով կարելի է ավելի արագ ոտքի կանգնել, քան թե գնալ ինչ-որ մեկի կոշիկները լպստելու ճանապարհով»:
Կարդացեք նաև
Արփինե ՍԻՄՈՆՅԱՆ
