Շահեն Հարությունյանի համադասարանցիները համոզված են՝ նրա արարքի մեջ վատ բան չկա:
Այսօր՝ սեպտեմբերի 14-ին, Ազատության հրապարակում մեկնարկեց «Ազատություն Շահեն Հարությունյանին խորագրով երթը: Երթին մասնակցում էին Շահեն Հարությունյանի համադասարանցիները եւ բոլոր նրանք, ովքեր դեմ են դատախազ Գեւորգյանի միջնորդությանը՝ դատապարտել «Ցեղակրոն» կուսակցության նախագահ Շանթ Հարությունյանի 15-ամյա որդուն 5 տարվա ազատազրկման:
Շահեն Հարությունյանի համադասարանցիներն իրենց հետ ունեին «Ազատություն Շահեն Հարությունյանին», «Մենք դեմ ենք 15-ամյա Շահենի ազատազրկմանը» գրառմամբ պաստառներ: Նրա նախկին համադասարանցի Սոնա Ավանեսյանը լրագրողների հետ զրույցի ընթացքում նշեց, որ իրենք դեմ են դատախազի այդ միջնորդությանը. «Շահենը շատ լավ մարդ է, շատ ընկերասեր է, միշտ պատրաստ է բոլորիս օգնել: Մենք բոլորով շատ մոտ ենք եղել Շահենի հետ, շատ ուրախ, անմիջական մարդ է նա: Շահենը եւ խուլիգանությունը իրարից շատ հեռու են, ինքն ընդամենը պաշտպանել է իր հորը, որ յուրաքանչյուրս էլ նրա տեղը լինեինք, ես համոզված եմ, որ այդպես կվարվեինք: Նրա արարքի մեջ ոչ մի վատ բան, հաստատ, ոչ ոք չի կարող գտնել»:
Ի պաշտպանություն Շահեն Հարությունյանի նախաձեռնության անդամ Ֆելիքս Հայրապետյանը նշեց, որ բոլորն էլ դեմ են առաջարկվող պատժամիջոցին եւ բոլոր քաղբանտարկյալների համար առաջարկված պատժամիջոցները ծիծաղելի են. «Եթե խուլիգանության տարբեր հոդվածներ են առաջարկել քաղբանտարկյալներին, ես ասեմ, որ այդպիսի մարդկանց առաջարկել այդպիսի մեղադրանք ուղղակի ծիծաղելի է, եւ ցանկացած երկրում դա կարող է որպես հումորի առարկա քննարկվել, բայց մենք լուրջ երկրում ենք ապրում եւ լուրջ հարցեր ենք քննարկում դատարանում: Առաջարկված տարիները, փաստորեն, ծիծաղի առարկա են, եւ եթե չբողոքենք յուրաքանչյուրը կարող է այդ 7,5-8 տարին նստել, էլ չեմ ասում Շահենին նրանք կկործանեն, ե՛ւ նրա պատանեկությունը, ե՛ւ նրա երիտասարդությունը, ե՛ւ նրա ապագան»:
Կարդացեք նաև
Չնայած ոչ աշխատանքային օրվան՝ երթի մասնակիցները՝ Շանթ Հարությունյանի նկարը պարզած, բղավելով «Ազատություն քաղբանտարկյալներին», «Ազատ, անկախ, Հայաստան» Մաշտոցի պողոտայով շարժվեցին դեպի ՀՀ կառավարության շենք, որտեղից էլ Հայաստանի Հանրապետության գլխավոր դատախազության շենք:
Ամի ՉԻՉԱԿՅԱՆ
Պայքարեք՝ Շահենի համադասարանցիներ։ Շուտով կգա այն ժ.կը երբ դուք հպարտ կքայլեք,՝ Ձեր կողմից կերտած, իսկական ազատ ու անկախ Հայաստանում։ Դուք վեհ գործ եք անում, լինելով Ձեր ընկերոջ կողքին, ով լավ երկիր կոռուցողն է ձեր հետ միասին։