Մոսկվայի հասարական-քաղաքական հետազոտությունների կենտրոնի տնօրեն, ռազմական փորձագետ Վլադիմիր Եվսեեւի գնահատմամբ, Հայաստանի` Եվրասիական տնտեսական միությանն անդամակցելու գործընթացը պայմանավորված է նաեւ Ուկրաինայի շուրջ տեղի ունեցող իրադարձությունների զարգացմամբ:
Ըստ նրա, Հայաստանի անդամակցության ձգձգման հարցում ուշացնող օբյեկտիվ պատճառներ կան: «Այս գործընթացը պետք է ամրագրվի հայ-ռուսական երկկողմ դաշնակցային հարաբերությունների ամրապնդմամբ»,- այսօր «Ռիա նովոստի» մամուլի ակումբում կազմակերպված Երեւան-Մոսկվա տեսակամրջի ժամանակ ասաց պարոն Եվսեեւը:
Նա նաեւ ակնարկեց, որ Ղազախստանը սկսել է շատ զգուշորեն մոտենալ մեր երկրի անդամակցությանը հարցին եւ նշեց, որ այժմ Ռուսաստանի եւ Ղազախստանի միջեւ լուրջ խնդիրներ կան, բայց սխալ համարեց խոսել ռուս-ղազախական հարաբերությունների հնարավոր խզման մասին:
Պարոն Եվսեեւի խոսքով, Չինաստանը նույնպես պատրաստվում է ներկայացնել իր ինտեգրման նախագծերը, եւ այդ պարագայում Եվրասիական տնտեսական միությունը պետք է պաշտպանի իր շահերը: Միաժամանակ նա կարծիք հայտնեց, թե համոզված չէ, որ Եվրասիական տնտեսական միությունը արագ կզարգանա: Վերջում էլ հավելեց. «Ռուսաստանի եւ Հայաստանի միջեւ հարաբերությունները սկզբունքային են.մենք պետք ենք միմյանց ոչ միայն տնտեսական առումով»:
Կարդացեք նաև
Անդրադառնալով Ղարաբաղյան հիմնահարցին` փորձագետը մտավախություն հայտնեց, որ նախորդ ամիս սկսված ադրբեջանական կողմի հարձակումները հնարավոր է կրկնվեն հաջորդ տարի եւս. «Պետք է ամրապնդել եվրասիական ինտեգրումը հայ-ռուսական երկկողմ հարաբերությունների ուժեղացմամբ, քանի որ այն, ինչ օգոստոսին տեղի ունեցավ Ղարաբաղում, կարող է կրկնվել նաեւ մեկ տարի անց: Մենք պետք է պատրաստ լինենք նմանատիպ իրադարձություններին համարժեք պատասխան տալուն, քանի որ դրանց կրկնությունը լիովին հնարավոր է: Միայն դաշնակցային հարաբերությունների ամրապնդումը կարող է կանխել նման սպառնալիքները»:
Արփինե ՍԻՄՈՆՅԱՆ
