Փոխվարչապետի պաշտոնը կլուծարվի՞ :
ՀՀԿ գործադիր մարմինն այսօր կայացած նիստի ժամանակ հավանություն է տվել Հարություն Սարգսյանի թեկնածությանը`Վայոց Ձորի մարզպետի պաշտոնում: Այն իր վաղվա նիստում կհաստատի ՀՀ կառավարությունը:
Այսօր այդ մասին ՀՀԳ ԳՄ նիստի ավարտից հետո, լրագրողների հետ զրույցում ասաց ՀՀԿ փոխնախագահ Արմեն Աշոտյանը: ՀՀԿ մամուլի խոսնակ Էդուարդ Շարմազանովը բացակայում է Հայաստանից, ուստի խոսնակի պարտականություններն այսօր իր վրա էր վերցրել Արմեն Աշոտյանը:
Նիստում քննարկվել է նաեւ կառավարության ներսում կառուցվածքային փոփոխությունների հարցը՝ ասաց Արմեն Աշոտյանը`հավելելով.«Բայց դրա մասին ճիշտ կլինի տեղեկանաք վաղը`կառավարության նիստի ժամանակ»:
Կարդացեք նաև
Aravot.am-ի հարցին`հնարավո՞ր է այդ փոփոխությունների արդյունքում փոխվարչապետի պաշտոնն ընդհանրապես լուծարվի, Արմեն Աշոտյանն ասաց, որ մեկ օրը ճակատագրական չի լինի: Հարցին`կառավարությունում կրճատումնե՞ր են սպասվում, բանախոսը հիշեցրեց, որ կառավարության կազմը հաստատված կարգով է:
«Առավոտի» ունեցած տեղեկություններով, մասնավորապես ստեղծվելու է նոր նախարարություն, որը գլխավորելու է Վաչե Գաբրիելյանը:
ՀՀԿ գործադիր մարմնի այսօր կայացած նիստում քննարկվել են նաեւ կուսակցության տարածքային կառույցների տեղական օղակների հետ կապված հարցեր, քննարկվել են անցած ՏԻՄ ընտրությունների արդյունքները, խոսվել է գալիք ՏԻՄ ընտրությունների մասին: ՀՀԿ-ն կարեւորություն է տալիս ՏԻՄ ընտրություններին եւ ակտիվորեն մասնակցելու է առաջիկա ընտրական փուլին:
Նելլի ԳՐԻԳՈՐՅԱՆ
