ՀՀ նախագահին, կառավարությանը եւ արդարադատության նախարարության աշխատակազմերին հարցում ուղարկած Բուդաղյանների փաստաբան Հայկ Ալումյանը դեռ պատասխան չի ստացել:
Բայց ինչպես ինքն է ասում` դեռ չի շտապում մտահոգվել իր հարցման պատասխանը չստանալուց, թեեւ հարցմանը պատասխանելու 5 օրյա ժամկետն անցել է. «Չգիտեմ` իմ ուղարկելուց հետո քանի օր անց են ստացել հարցումս, այդ պատճառով նորմալ է, դեռ սպասում եմ պատասխանի»:
Հիշեցնենք, որ նա հարցման միջոցով փորձել է պարզել, թե արդյոք ՀՀ նախագահը, վարչապետը մասնակցե՞լ են Սյունիքի մարզպետ Սուրիկ Խաչատրյանի որդու՝ Տիգրան Խաչատրյանի հարսանիքին:
Նա Aravot.am-ի հետ զրույցում հաստատեց ավելի վաղ News.am-ին հայտնած իր պնդումը, որ «Եթե պարզվի, որ նրանք մասնակցել են հարսանիքին, ապա դատարանում Սուրիկի Խաչատրյանի որդու Տիգրան Խաչատրյանի նկատմամբ քրեական հետապնդումը դադարեցնելու վերաբերյալ մեր հայցն անիմաստ է դառնում, եթե նախագահն ու վարչապետը գնում են մտերիմի հարսանիքին»:
Կարդացեք նաև
Պարոն Ալումյանը իր հարցման պատասխանը ստանալուց հետո, այլեւս չի սպասելու ներպետական ատյանների դատավճիռներին, դիմելու են Մարդու իրավունքների եվրոպական դատարան` համապատասխան ապացույցներով, որ ներպետական ատյանները արդյունավետ չեն:
Հայկ Ալումյանի հայտարարությունը մեկնաբանեց նաեւ Սյունիքի մարզպետի խորհրդական Վոլոդյա Հովհաննիսյանը` վստահեցնելով, որ ինքը տեղեկություններ չունի, թե արդյոք վարչապետն ու նախագահը մասնակցե՞լ են Տիգրան Խաչատրյանի հարսանիքին, թե` ոչ. «Հայաստանի Սահմանադրության համաձայն դատարանները անկախ են եւ անկախ են իրականացնում արդար դատաքննություն: Թե ով է մասնակցել ում հարսանիքին, չի կարող ազդել դատարանի վրա ու նպաստել դրական արդյունքով դատավճռին: Ես պնդում եմ` անկախ մարմնի վրա որեւէ մեկը չի կարող ազդել»:
Aravot.am-ի աղբյուրը`Գորիսի բնակիչը, պատմեց, որ մարզպետի որդու հարսանիքին բարձրաստիճան շատ պաշտոնյաներ են մասնակցել. «Ահագին նախարարներ են եղել, մենակ ոստիկանապետը չի եկել, նախագահն էլ է ներկա եղել ու պարել է»:
Արփինե ՍԻՄՈՆՅԱՆ