«Բանակը իր մեջ ներգրավում է այն, ինչ տեղի է ունենում հասարակությունում»,- փետրվարի 6-ին, «Հայելի» մամուլի ակումբում լրագրողների հետ հանդիպման ընթացքում, անդրադառնալով Վազգեն Սարգսյանի անվան ռազմական ինստիտուտում տեղի ունեցած սպանությանը, հայտարարեց հոգեբան Ռուբեն Աղուզումցյանը:
Նրա խոսքերով՝ սպանությունը ավելի խորը պատճառներ կարող է ունենալ: Նա հավելեց, որ անորոշության մեջ առաջ են գալիս հոգեբանական, ֆիզիկական ռեակցիաներ, որոնք ագրեսիայի ձեւով են արտահայտվում, եւ այդ ագրեսիան ունի նաեւ ինքնապաշտպանական նշանակություն. «Մարդու եսի հիմքը դրվում է վաղ հասակից, մանկությունում դնում են այն ամենը, ինչը ապագայում դրսեւորվում է ագրեսիայի ձեւով: Օրինակ՝ անապահով ընտանիքների երեխաների, միակողմանի ծնողազուրկ երեխաների մոտ մոտավորապես վեց անգամ հակասոցիալական վարքն ավելի բարձր է: Այսինքն՝ դաստիարակությունը շատ մեծ դեր է կատարում, իսկ մենք գիտենք, որ դաստիարակությունը սկսվում է ընտանիքից եւ հիմնականում մայրն է փոքր հասակից դաստիարակում»:
Հոգեբանը ընդգծեց, որ բանակում ծառայում է այն մարդը, որը մեր կողքին է ապրում, եւ մենք նրան խուլիգան ենք անվանում. «Բանակայինի հետ գործ է ունենում ստորին սպայական կազմը, որը ե՛ւ կրթությամբ, ե՛ւ վարքով չի տարբերվում: Եվ այսպես ստացվում է մի ամբողջական օղակ մեկը մյուսից դուրս եկող, այս առումով պատճառն ավելի խորն է: Տեսե՛ք երեխան փոքր տարիքից ինչպե՞ս է դաստիարակվում, ինչի շնորհի՞վ՝ հեռուստատեսության, համակարգչի եւ ծնողի ոչ ճիշտ մոտեցումը: Իսկ ծնողը ճիշտ չի մոտենում, որովհետեւ չկա ծնողի ուսուցման համակարգ»:
Ամի ՉԻՉԱԿՅԱՆ
