ԱԺ ԲՀԿ պատգամավոր, Մարդու իրավունքների հանձնաժողովի նախագահ Էլինար Վարդանյանն իր ֆեյսբուքյան էջում հայտարարություն է տարածել.
Այսօր դիմակավորված զինված անձինք անհայտ ուղղությամբ են տարել «Կասեցում» նախաձեռնության մասնակից, Շրջանառության հարկի մասին օրենքի դեմ ակտիվ պայքարող Արտակ Խաչատրյանին:
Արտակ Խաչատրյանը այս մասին հասցրել է ասել իմ գործընկեր Վահան Բաբայանին, հասցնելով նշել, որ իրեն դիմակավորված անձինք ձերբակալել են և տանում են անհայտ ուղղությամբ: Արտակ Խաչատրյանի հանդեպ այս ռեպրեսիվ մեթոդների կիրառման պատճառների մասին դժվար չէ ենթադրություններ անել։ Իմ տվյալներով ոստիկանությունը բերման ենթարկելու մասին որևէ ինֆորմացիա չունի։
Ես, որպես ԱԺ Մարդու իրավունքների պաշտպանության և հանրային հարցերի հանձնաժողովի նախագահ պահանջում եմ վերջ տալ այս հրահրող գործողություններին, ձեռնարկել բոլոր անհրաժեշտ միջոցառումները Արտակ Խաչատրյանի գտնվելու վայրը պարզելու և նրան ազատ արձակելու ուղղությամբ։ Ես դիմել եմ նաև Ոստիկանության Երևանի վարչության պետին, և ակնկալում եմ, որ նա հետևողական կլինի այս հարցում։
Ի վերջո մարդկանց համբերության բաժակն անհատակ չէ, գոնե վերջին ամսվա ընթացքում պետք է համոզվեիք, և այսպիսի մեթոդներով չէ, որ հնարավոր է լինելու զսպել ժողովրդի բողոքի ալիքը։
