Փետրվարի 15-ին նշվեց Բուն Բարեկենդանը: Տոնի առթիվ ԱՀԹ առաջնորդական փոխանորդ Տ. Նավասարդ արքեպիսկոպոսի օրհնությամբ թեմի երիտասարդաց միությունները կազմակերպել էին մեծ միջոցառում, որին մասնակցում էին ոչ միայն թեմի համայնքների անդամները, այլ նաև Երևանի վարչական շրջանների երգուպարի, ազգային նվագարանների խմբերը, Մշակույթի նախարարության ազգագրական խմբերը` «Վան», «Ակունք», «Նուբար», «Վերադարձ», «Կարին», «Մարաթուկ», Ոստիկանության երգիպարի «Նկարագիր» համախումբը:
Ազգային նվագարանների, թմբկահարների, դհոլահարների խմբերի ուղեկցությամբ ու ազգային երգերի կատարումներով բարեկենդանյան շքերթը մեկնարկեց ԱՀԹ առաջնորդանիստ ս. Սարգիս եկեղեցուց: Անցնելով Մեսրոպ Մաշտոց պողոտայով` հարյուրավոր մասնակիցների միացան պատահական անցորդներ և քայլելով մինչև Կասկադ համալիր՝ մեծ տոնախմբությամբ նշեցին Բուն Բարեկենդանը:
Ազգային տոնի վերազարթոնքին էին միացել բազմաթիվ ստեղծագործական խմբեր, հայկական հեքիաթների հերոսներ, ծաղրածուներ: Երևանի թատրոնի և կինոյի պետական ինստիտուտի մի խումբ ուսանողներ բեմադրել էին բարեկենդանին բնորոշ ներկայացումներ: Առանձնահատուկ հետաքրքրություն էին առաջացրել ազգային խաղերը` աքլորակռիվ, պարանքաշոցի, հոլ և այլն:
Կարդացեք նաև
Կասկադ համալիրի տարածքում իրենց աշխատանքներն էին ներկայացրել Երևանի մի շարք բուհերի ուսանողներ, ովքեր նախորդ շաբաթ մասնակցել էին ս. Սարգիս զորավարի տոնի առթիվ կազմակերպված «Սիրո ուժն է անհաղթ» ցուցահանդես- մրցույթներին:
Թեմի երիտասարդական միություններից յուրաքանչյուրը պատրաստել էր Բարեկենդանին բնորոշ ժողովրդական ուտեստներից մեկն ու տոնախմբության ընթացքում հյուրասիրում էին մասնակիցներին:
Բարեկենդանը խորհրդային տարիներից հետո հասարակության տարբեր խմբեր սկսեցին տոնել: Արդեն երկրորդ տարին է, որ Բուն Բարեկենդանի տոնին ավելի մեծ ժողովրդականություն հաղորդելու համար Արարատյան Հայրապետական թեմի երիտասարդները Նավասարդ Սրբազանի աջակցությամբ ու օրհնությամբ տոնախմբություններ են կազմակերպում:
Նախորդ տարվա նման այս տարի ևս Երևանի քաղաքապետարանի հանձնարարությամբ վարչական շրջաններում նախընթաց շաբաթվա ընթացքում կազմակերպվեցին ուրախ տոնակատարություններ, հանդեսներ, ցուցադրություններ: Դրանք այս տարի ամբողջացան տոնի բուն օրը կազմակերպված տոնախմբության ժամանակ:
Ազգային մշակույթի և, հատկապես, տոների վերականգնման հարցում մեծ է երիտասարդների դերը: Այդ առումով Արարատյան Հայրապետական թեմի երիտասարդաց միությունների անդամները լուրջ գործունեություն են ծավալում` իրենց շուրջ համախմբելով ավելի ու ավելի շատ կազմակերպություններ ու երիտասարդների:
Միասի´ն վերականգնենք մեր ազգային տոները:
Արարատյան Հայրապետական թեմի տեղեկատվական բաժին
Շատ հաճելի է: Յուսով եմ՝ լաւ նշեցիք Բարեկենդանը: Ցանկութիւնս է, որ Հայաստանում աւելի աշխոյժ նշեն այս գեղեցիկ տօնը:
Բոլորիս մաղթում եմ ուրախ ու թեթեւ Պահոց օրեր:
– – – – – – –
Մի քանի խորդուրդ ՊԱՀԱպաններին ( 🙂 )
Յայտնի բան է, որ բուսական սննդակարգը առողջարար է: Այնուամենայնիւ, արժէ ուշադրութիւն դարձնել մի քանի բաների վրայ:
Խիստ բուսական սննդում գրեթէ բացակայում են վիտամին B12, որոշ չափով վիտամին D, Ca-ը: Վերջին երկուսը յաղթահարելի են: Ուստի առաւել ուշադիր եղէք B12-ի նկատմամբ:
Գերմանիայում, մասնաւորաբար, վաճառում են բուսական (սոյայի) կաթ կամ հիւթ, որոնք հարստացուած են զանազան վիտամիններով՝ ներառեալ B12:
Այս վիտամինի պակասից կարող են խոցային որոշ երեւոյթներ նկատուել կամ շրթունքների, բերանի լորձաթաղանթի, եղունգների շրջանի ճաքեր: Շատ կարեւոր վիտամին է:
Ինչ վերաբերում են միւս տարրերին՝ հիմնականում խնդիր չկայ: Զանազան բուսատեսակները եւ ՄՐԳԵՐԸ լիովին բաւարար են: