Այսօր ԱԺ-ում Տնտեսական մրցակցության պաշտպանության պետական հանձնաժողովի նախագահ Արտակ Շաբոյանը ներկայացնում էր հանձնաժողովի 2015-ի գործունեության ծրագրերը:
ԲՀԿ խմբակցության ղեկավար Նաիրա Զոհրաբյանը նրան հարց ուղղեց՝ պաշտպանելով Նիկոլ Փաշինյանի կարծիքը, որ ՀՀ-ում շաքարավազի եւ բանանի շուկայում մենաշնորհ կա. «Այն, որ Հայաստանում տարբեր ոլորտներում, այդ թվում՝ վերոնշյալ ոլորտներում կան տնտեսական մենաշնորհներ՝ դա որեւէ մեկի համար գաղտնիք չի: Շատ հեզաճկուն քայլերով ՀՀ քաղաքացիներն ամեն օր տեսնում են, թե ինչպես են մթերային խանութներում, սուպերմարկետներում շատ նուրբ կերպով՝ օրական 5, 10 դրամով ավելանում կենսական նշանակության մթերքների գները՝ կաթնամթերք, բանջարեղեն, միրգ եւ այլն: ՀՀ-ում ուղղակիորեն միջին խավ հասկացությունը վերացել է, մենք գործ ունենք շատ փոքր հարուստ մարդկանց խավի հետ, որոնք ամեն օր ապրանքների գները ավելացնում են: Գոյություն ունի բնակչության աղքատության մեծ տոկոս: Եվ երկրորդ հարցը՝ բազմաթիվ խանութներ, անտեսելով օրենքը, ուղղակիորեն թքած ունենալով օրենքի վրա, իրենց իրավունք են վերապահում իրենց խանութների վրա փակցնել՝ «գնված ապրանքը հետ չի վերցվում» հակաօրինական մակագրությունը: Օրինակ, Աբովյան փողոցի բուտիկներից յուրաքանչյուրում փակցված է օրենքին հակասող այդ մակագրությունը: Մինչդեռ 14 օրվա ընթացքում ապրանքը կարող է հետ վերադարձվել»:
Արտակ Շաբոյանը պատասխանեց, որ գնագոյացման խնդիրները գտնվում են հանձնաժողովի տեսադաշտում այնքանով, որքանով այդ շուկաներում կան խոշոր ընկերություններ եւ այնքանով, որքանով կա գների չհիմնավորված բարձրացումներ: Ինչ վերաբերում է խանութների նման գրառումներին, Շաբոյանն ասաց, որ դա իրենց գործունեությունից դուրս է. «Ամեն դեպքում հասկանում եմ ձեր մտահոգությունը, խոստանում եմ հետեւողական լինել, ուսումնասիրել խնդիրը եւ բացահայտել, ներկայացնել արդյունքները»:
Հռիփսիմե ՋԵԲԵՋՅԱՆ
