2015թ. մարտի 26-ին Հայաստանի Դեմոկրատական կուսակցության (ՀԴԿ) կենտրոնական գրասենյակում կայացավ կուսակցության Հանրապետական խորհրդի նիստը:
Քննարկվեցին հետևյալ հարցերը.
1. ՀԴԿ VIII համագումարը հրավիրելու հարցը:
2. Աշխատավորների համերաշխության օրվա կապակցությամբ Սոցիալ-դեմոկրատ Հնչակյան կուսակցության (ՍԴՀԿ) կողմից հայտարարված հանրահավաքին մասնակցելու հարցը:
Կարդացեք նաև
3. Սահմանադրական բարեփոխումների վերաբերյալ կուսակցության դիրքորոշման հարցը:
ՈՐՈՇՎԵՑ՝
· Կուսակցության VIII համագումարը հրավիրել 2015թ. հունիսի 13-ին:
· Ելնելով ՀԴԿ ծրագրային գաղափարական դրույթներից, և նրա հիմքում ընկած սոցիալական արդարության սկզբունքի կենսագործման անհրաժեշտությունից, մասնակցել աշխատավորների համերաշխության օրվա կապակցությամբ 2015թ. մայիսի 1-ին ՍԴՀԿ-ի կողմից հայտարարված հանրահավաքին՝ ներգրավելով ինչպես կուսակցության տարածքային և երիտասարդական կառույցները, այնպես էլ մեզ հետ սերտորեն համագործակցող հասարակական հատվածի կազմակերպությունները: Այդ նպատակով առաջարկել ՍԴՀԿ-ին ստեղծել միասնական կազմակերպական գործողություններ իրականացնող մարմին (շտաբ):
· Սկսել սահմանադրական բարեփոխումների հայեցակարգի դրույթների քննարկումը և ՀՀ Նախագահին առընթեր սահմանադրական բարեփոխումների մասնագիտական հանձնաժողովին և հանրությանը ներկայացնել ամփոփ եզրակացություն իր դիրքորոշման և մոտեցումների վերաբերյալ: Հատուկ քննարկման առարկա է դառնալու կառավարման համակարգի փոփոխման հարցը:
· Միաժամանակ, խորհուրդը վերահաստատում է կուսակցության այն դիրքորոշումը, որ գործող սահմանադրությունը որևէ կերպով չի կաշկանդում այսօրվա իշխանություններին՝ համակարգային կերպով լուծելու երկրում կուտակված սոցիալ-տնտեսական լուրջ և հրատապ խնդիրները, կազմաքանդելու օլիգարխիկ-մենաշնորհային համակարգը, իրագործելու սահմանադրությամբ ամրագրված սոցիալական պետության գործառույթները, ապահովելու մարդու կենսական իրավունքները, որպիսիք են՝ աշխատանքը, արժանավայել աշխատավարձը, բավարար կենսաթոշակը և այլն:
ՀԴԿ մամուլի ծառայություն
Երևան, 27.03.2015թ.