Երեկ երեկոյան քննչական կոմիտեում հարցաքննվել է նաեւ «Կոռնիձոր» ջոկատի հրամանատար Արայիկ Խուդավերդյանը:
«Որպես «Հիմնադիր խորհրդարանի» պատգամավոր հարցնում էին` ինչ եմ ստեղծել, ինչու եմ ստեղծել: Նրանց հետարքրքությունը հիմնականում գնում էր` ապրիլի 24-ի դեպքերն ինչ զարգացում կունենան, ինչպիսի դերակատարում կունենան Ժիրայր Սեֆիլյանն ու մյուսները: Ժողովուրդն ինչպիսի տրամադրություն կունենա: Հիմնական շեշտը սրա վրա էին դնում: Ժողովուրդը կանգնի, ռեժիմը կտապալի, ժողովուրդը չկանգնի, ռեժիմը ժողովրդին կխուզի: Ամեն ինչ կախված է ժողովրդի կամքից»,- Aravot.am-ին ասաց Արայիկ Խուդավերդյանը:
Նրա խոսքով, Վանաձորում իրենց նախատեսած հանրահավաքն են անցկացնելու, եւ սկսված գործընթացը ընթացքի մեջ է. «Անձի դերը կա, գոյություն ունի, բայց գործունեությունների հետագա զարգացումները անձի դերով չեն սահմանափակվում: Եթե կազմակերպությունը կրում է «Հիմնադիր խորհրդարան» անունը ու ունի ժողովրդական շարժում` «100-ամյակն առանց ռեժիմի», ինձ չի թվում, որ «Հիմնադիր խորհրդարանն» իր օրենսդիր գործունեությունը պետք է դադարեցնի»:
Մեր հարցին, թե «Հիմնադիր խորհրդարանի» ղեկավարների ձերբակալություններով իշխանությանը չի՞ հաջողվի տապալել ապրիլի 24-ին նախատեսված ակցիաները, նա պատասխանեց. «Դե իշխանությունները Գագիկ Ծառուկյանին տապալեցին, իշխանությունից ամեն ինչ կարելի է սպասել»:
Կարդացեք նաև
Արփինե ՍԻՄՈՆՅԱՆ
