Լեռնային Ղարաբաղում մայիսի 3-ին տեղի են ունենալու խորհրդարանական ընտրությունները: Խորհրդարանական ընտրություններին ընդառաջ Լեռնային Ղարաբաղի կենտրոնական ընտրական հանձնաժողովի նախագահ Սրբուհի Արզումանյանը հանդես եկավ մամուլի ասուլիսով:
«Հաշվի առնելով մեր հանրապետության ընտրական համակարգում 1991 թվականից կուտակված փորձը, համապետական ընտրություններ եւ հանրաքվեներ կազմակերպելու գործում միջազգային դիտորդների ներկայացրած առաջարկություններն ու եզրակացությունները, ընտրական օրենսդրության կատարելագործմանը զուգընթաց վերջին տարիների բարեփոխումները կարելի է փաստել, որ Լեռնային Ղարաբաղի Հանրապետությունում անցկացվող յուրաքանչյուր ընտրություն համեմատ նախորդի առավել դրական տեսք է ունենում: Համենայն դեպս դրան են ձգտում ե՛ւ ընտրական հանձնաժողովները, ե՛ւ պետաական իշխանության այլ մարմինները, եւ ամենակարեւորը՝ Լեռնային Ղարաբաղի ընտրողները»,- ասաց նա:
ԿԸՀ նախագահը հայտարարեց, որ նախորդ խորհրդարանական ընտրությունների համեմատ կրկնապատկվել է թեկնածուների թիվը, ինչը նպաստել է մրցակցության բարձրացմանը. Թեկնածուի կարգավիճակ ունեն 184 քաղաքացիներ, որոնցից 41-ը կանայք են. «Մայիսի 3-ի ընտրություններին վերջին տվյալներով մասնակցելու իրավունք կունենան 101 հազար 653 ընտրող, այսինքն՝ 3135-ով ավելին, քան նախորդ 2010 թվականի ընտրությունների ժամանակ: Սա նշանակում է, որ այս ընտրություններին մասնակցելու հնարավորություն ունի Լեռնային Ղարաբաղի Հանրապետության բնակչության 68 տոկոսից քիչ ավելին»:
Անդրադառնալով նախընտրական քարոզարշավին՝ Սրբուհի Արզումանյանը տեղեկացրեց, որ քարոզարշավի ընթացքում որեւէ լուրջ միջադեպ, առավել եւս՝ խախտում չի արձանագրվել, ընտրական հանձնաժողովներ դիմել են հիմնականում պարզաբանումների համար թերություններ եւ բացթողումներ շտկելու հարցով, որոնք արդեն լուծված են. «Իհարկե՛, սա չի նշանակում, որ ընդհանրապես խնդիրներ չեն ծագում, բայց սրանք լուծելի են եւ բավականին արագ ձեւով լուծվում են»:
Կարդացեք նաև
Ամփոփելով իր խոսքը՝ Սրբուհի Արզումանյանն ասաց. «Հավատացած եմ, որ մայիսի 3-ին հերթական խորհրդարանական ընտրությունները պատշաճ մակարդակով են անցկացվելու: Այս ընտրությունները պետք է ավելի արդարացի, կազմակերպված եւ օբյեկտիվ լինեն: Համոզված եմ՝ դա գիտակցում են թե՛ ընտրական համակարգի պատասխանատուները եւ թե՛ իրենց ընտրական իրավունքն իրականացնող ԼՂՀ քաղաքացիների մեծ մասը»:
Ամի ՉԻՉԱԿՅԱՆ
