Չաշխատող «Նաիրիտ» գործարանում նոր փոխտնօրեն աշխատանքի ընդունելն արդյոք նպատակահարմա՞ր է: Այսօր այս հարցին Էներգետիկայի եւ բնական պաշարների նախարար Երվանդ Զախարյանն ասաց, որ ընկերության խորհուրդն է որոշել փոխտնօրեն ընդունել: Ինչ վերաբերում է տնօրենի եւ փոխտնօրենների աստղաբաշխական աշխատավարձերին, պարոն նախարարը վստահեցրեց, որ, այո, մի ժամանակ այդպիսի բարձր աշխատավարձեր կային, հիմա՝ ոչ:
«Հայաստանի էլեկտրական ցանցեր»-ի հնարավոր վաճառքի մասին էլ նախարարն այսօր լրագրողների հետ հանդիպման ժամանակ տեղեկությունը ոչ հաստատեց, ոչ էլ հերքեց:
Դիտարկմանը, որ հավանական գնորդի անուն էր շրջանառվում՝ «Տաշիր գրուպի» սեփականատեր Սամվել Կարապետյանը, որը չնայած արդեն հերքել է այս լուրը, նախարար Զախարյանն ասաց, որ ՀԷՑ-ի 100% բաժնեմասը ռուսական «ԻՆՏԵՐ ՌԱՕ ԵԷՍ» ընկերությանն է պատկանում. «Իսկապես ֆինանսական դժվարություններ ունի եւ մտածում է բաժնետոմսերի կամ դրանց մի մասի վաճառքի մասին: Բայց ես իրական տեղեկատվություն չունեմ, որ ՀԷՑ-ը 100%-ով վաճառում են: Եթե նման տեղեկատվություն լիներ, ապա առաջիններից մեկը ես կիմանայի: Երբ ես հնարավորություն ունենամ այդ մասին ինչ-որ բան ասել, ես դա կանեմ»:
Նելլի ԲԱԲԱՅԱՆ
