Այսօր էլեկտրաէներգիայի սակագնի բարձրացման թեմայով խորհրդարանական լսումների ժամանակ ՀԱԿ խմբակցության քարտուղար Արամ Մանուկյանը Հանրային ծառայությունները կարգավորող հանձնաժողովի նախագահ Ռոբերտ Նազարյանից հետաքրքրվեց՝ «Դուք տեղյա՞կ էիք, թե ինչ բարեգործություններ են արել ՀԷՑ-ում: Սա բեռ է, ծախս է, որ իմ հարցին, բոլոր հարկատուների հաշվին մարդիկ արել են հետեւյալ բարեգործությունները մանկապարտեզներ, մանկատներ, ծերանոցներ, Հովիկ Աբրահամյանի եկեղեցին, մանկատներում ապրողների ամուսնություններ եւ հազար ու մի ծախսեր: 7 հատ եկեղեցի են վերանորոգել, ի՞նչ իրավունքով, ո՞վ է թույլ տվել, ո՞վ է նրանց դիմել՝ այս բարեգործություններն անելու համար: Կառավարությունը չէ՞ր կարողանում Բիբինին ասել, որ ինչի՞ ես այս բարձր տոկոսներով վարկեր վերցնում, որ հետո դառնալու էր պարտք»:
Ռոբերտ Նազարյանը պատասխանեց. «Անկեղծ ասած, այդ բարեգործությունը, ինչ հիմա թվարկում եք, գիտեմ կամ մամուլից, կամ ձեր հրապարակային ելույթներից, որովհետեւ պարոն Բիբինը իր սեփականատերերի հետ միասին կարող են իրենց շահույթի հաշվին բարեգործություն անել: Ինչ չափի, ինչ սահմանի՝ իրենց իրավունքն է: Եթե ցույց կտաք ՀՀ որեւէ օրենք, որը մեզ կամ ձեզ հնարավորություն է տալիս ասել, թե ինչի եք դուք բարեգործություն անում, ուրեմն ես կասեմ, որ մենք մեր տեղում չենք: Այդ բարեգործությունները որեւէ ուրիշ երկրում չեն արել, մեր երկրում են արել: Հիմա ինչի է արել, խի է արել՝ չգիտենք, ոչ էլ ինձ հետաքրքիր է իմանալ»:
Հռիփսիմե ՋԵԲԵՋՅԱՆ
