Այս տարի արդեն 3-րդ անգամ Երևանում կանցկացվի Առնո Բաբաջանյանի անվան պատանի և երիտասարդ դաշնակահարների միջազգային մրցույթ-փառատոնը, որի մեկնարկը տրվեց այսօր և կշարունակվի մինչև հունիսի 24-ը:
Մրցույթ-փառատոնը կազմակերպվում է ՀՀ կրթության և գիտության նախարարության և Երևանի Առնո Բաբաջանյանի անվան պետական երաժշտամանկավարժական քոլեջի նախաձեռնությամբ:
«Զարմանալ պետք չէ, որ Կրթության և գիտության նախարարությունն է երաժշտական նման փառատոն կազմակերպում, որովհետև մեզ և Մշակույթի նախարարության համար կրթությունն ու մշակույթը երկու անբաժանելի ոլորտներ են: Իմ խորին համոզմամբ՝ մշակութային մարդը պետք է լինի կիրթ, իսկ կիրթ մարդը՝ մշակութային: Չկա կրթություն առանց մշակույթի և չկա մշակույթ առանց կրթության»,- ասաց ՀՀ կրթության և գիտության նախարար Արմեն Աշոտյանը:
Նրա գնահատմամբ՝ այս փառատոնը շատ լավ հնարավորություն է երիտասարդ, սկսնակ երաժիշտների համար՝ դրսևորելու իրենց ունակությունները և նաև հայտնվելու հասարակության ուշադրության կենտրոնում. «Իհարկե, հաճելի է տեսնել աստղեր, բայց շատ ավելի հաճելի է, երբ այդ աստղերի աճն ես տեսնում, հիշում ես նրանց պատանեկան, ուսանողական տարիներից, հետո տեսնում ես վերջնարդյունքը, թե ինչպես է այդ մարդն աճել ու մեզ էլ իր հետ աճեցրել, որովհետև մշակույթով իրականում բոլորս ենք սնվում»,- ասաց կրթության և գիտության նախարարը:
Կարդացեք նաև
Տեղեկացնենք, որ մրցույթ-փառատոնը կանցկացվի տարիքային երեք խմբով.
1) պատանեկան «Ա» խումբ (մինչև 10 տարեկան ներառյալ)
2) պատանեկան «Բ» խումբ (11-15 տարեկան ներառյալ)
3) երիտասարդական (16-18 տարեկան ներառյալ)
Մրցույթ-փառատոնի տարիքային բոլոր խմբերի մրցութային ծրագրում ընդգրկված են Ա. Բաբաջանյանի դաշնամուրային ստեղծագործությունները:
Պատանեկան խմբերում մրցույթ-փառատոնը կանցնի մեկ, իսկ երիտասարդական խմբի բոլոր մասնակիցների համար՝ երկու փուլով:
Պատանի ու երիտասարդ դաշնակահարների միջազգային 3-րդ մրցույթ-փառատոնին մասնակցության հայտ են ներկայացրել Երևանի ու ՀՀ տարբեր մարզերի, Լեռնային Ղարաբաղի, Ռուսաստանի Դաշնության, Վրաստանի, Ղազախստանի և Չինաստանի 100-ից ավելի դաշնակահարներ:
Իսկ ժյուրիի կազմում ընդգրկված են պրոֆեսորներ Գ. Մուխամեդջանովան՝ Ղազախստանից, Վլադիմիր Օրլովսկին՝ ՌԴ-ից, Ալեքսանդր Գարբերը՝ Վրաստանից: Հայաստանից ժյուրիի կազմում են Կոնսերվատորիայի պրոֆեսորներ Վաղարշակ Հարությունյանը, Արմեն Բաբախանյանը, Անահիտ Բոգդանյանը, Սուրեն Զաքարյանը, Արմինե Գրիգորյանը:
Մրցույթ-փառատոնի հաղթողները կպարգևատրվեն դափնեկրի դիպլոմով և Երևանի «Գնոմոն» ոսկերչական գործարանի պատրաստած հուշամեդալով, որի վրա պատկերված է Ա. Բաբաջանյանի կիսադեմը: Պատանի դաշնակահարների համար սահմանված են նաև հատուկ մրցանակներ:
Սիրանուշ ՀԱՅՐԱՊԵՏՅԱՆ
